Antzerki Zikloarekin hasiko da martxoa, eta saio bana izango da hilaren aurreneko hiru egunetan: Etxekoak martxoaren 1ean, Euskal Herria goitik behera zeharkatzen ari den obra; Solitudes hilaren 2an, testurik gabea eta maskaren teknika darabilena; eta El florido Pensil-Neskak 3an, euskal obra klasiko baten bertsio berria dena. Saio guztiak, iluntzeko 20:00etan izango dira, Biteri kultur etxean.
Nabarmendu dute, kalitate eta esperientzia haundiko konpainiak direla, Antzerki Ziklo honetan egongo direnak: Tanttaka, Kulunka eta Artedrama.
Sarrerak Biterin, goizetik
Hiru saioetarako sarrerak, gaur bertan jarriko dituzte salgai Biterin: goizean, 09:00etatik 14:00etara; eta arratsaldean, 16:00etatik 20:00etara. Sarreren erdiak bakarrik jarriko dituzte salgai gaur goizean, eta beste erdia gordeko dute arratsaldetik aurrera saltzeko.
Saio bakoitza 7 euro dira, baina hiru egunetarako bonua hartuz gero, merkeago ateratzen da: 16,5 euro guztira.
‘Etxekoak’
Ezin da edonor etxean sartu. Hala dio legeak. Maddik Mamadou maite du. Halaxe dio bihotzak. Istorio pertsonal batetik abiatzen da antzezlana, inmigrazioaren gaia jorratzeko.
‘Solitudes’
Kartetan egin besterik nahi ez duen agure bat. Alargundu den agure bat. Norekin jokatu ez duen agure bat. Etsitzen ez duen agure bat.
‘El florido Pensil-Neskak’
Antzezlanak kontatzen du, gerraondoko Espainiako hezkuntza sistemaren krudeltasun absurdo eta zentzugabea jasaten duten bost neskatoren egunerokoa. Eskola, gizartearen eta horren ideologia menderatzailearen isla zen, Erdi Aroko patriarkatu sakonena berreskuratu eta ezarri zuena.