Bizikleta gainean jarri, eta mendi ibilbideetan barrena, Trialsin probak ikusi eta probatzeko aukera izango da gaur, 10:30etan hasita, Fagollagan.
Batetik, erakustaldiak egingo dituzte Trialsinean adituek; tartean, Ion Areitio hondarribiarrak. Bestetik, haurrek ere kirol hau probatzeko aukera izango dute, prestatu dituzten sei zirkuituetan.
Areitio, munduko onenen artean
Erakustaldia egingo duen kirolarietako bat Ion Areitio hondarribiarra izango da; zuhaitz eta harri tartean, oztopoak gainditzen daukan abilezia erakutsiko du.
Areitio Ereñotzun izana da aurretik ere, eta azken bi edizioetan bera izan zen onena; behin, Benito Ros menderatuta, gainera. Bestalde, aurten, munduko rankinean laugarren dago, aurreko asteburuan Kataluniako Kopan nagusituta.
Bizikletak eta kaskoak eskura, probatzeko
Ikusi bakarrik ez; gaurkoan, Trialsina probatzeko aukera ere izango dute bertaratutakoek. Sei zirkuito prestatu dituzte, baita umeek egiteko modukoak ere, eta bizikletak eta kaskoak bertan utziko dituzte.