Giro goxoa izan zen atzo, Basque Culinary Centerren, bertsolariak entzuten. Maialen Lujanbio, Aitor Mendiluze, Eli Pagola eta Andoni Egaña fin asko ibili ziren, Joxe Luix Urdangarinek jarritako gaiei umorearekin, graziarekin, eta gatza eta piperrarekin erantzuten.
Eta etorkizuneko sukaldari haundien unibertsitatean egonda, gatza eta piperra baino gehiago zuten jaki gozo eta gaziak dastatzeko aukera izan zuten gero, bertaratutakoek. Sagardotegietan oinarritutako menu berezia prestatu zuten ikasleek, Sagarlorerekin egindako koktel batekin hasita.
Eskerrak, parte hartu duten guztiei
Jaki gozo eta gaziek, eta bertsolariek sortutako giro goxoak, iluntze ederra pasarazteko aukera eman zieten bertaratutako guztiei.
Hain zuzen, horregatik, Kronikak eskerrak eman nahi dizkie modu batera edo bestera atzoko Bertso Gutiziak ekitaldia gauzatzen lagundu zuten guztiei: bertaratutako herritarrei, sarrerak saltzen lagundu duten tabernariei, bertsolariei, ekitaldia babestu duen Insalusi eta Basque Culinary Centerri, emandako aukeragatik, eta ikasleei, prestatutako menu eder horrengatik.