Basque Culinary Centerren, ekitaldi berezia izango da otsailaren 19an, arratsaldeko 19:00etan hasita: bertso saio dotorea, eta afari goxoa.
Bertso Gutiziak izeneko saio honetarako sarrerak, salgai daude dagoeneko 20 euroan, Kronikan, Hernaniko Kixkal eta Aralar tabernetan, Ereñotzuko Irrintzin, Astigarragako Ikatzan, eta Goizuetako Amaia kafetegian.
Bertso Eskolako bertsolariak, Egañak lagunduta
Arratsaldeko 19:00etan hasiko den saioan, Hernaniko Bertso Eskolako bertsolariak izango dira protagonista. Hain zuzen, Maialen Lujanbio, Aitor Mendiluze eta Eli Pagola ariko dira kantuan. Eta haiekin batean ariko da, baita ere, Andoni Egaña txapeldun haundia. Gai jartzaile, berriz, Joxe Luix Urdangarin izango dute.
Saioa Basque Culinary Centerreko aretoan izango da, eta ondoren, afaria egingo da jangelan.
Maialen Lujanbio, Aitor Mendiluze, Eli Pagola eta Andoni Egaña ariko dira bertsotan, eta Joxe Luix Urdangarinek jarriko ditu gaiak.
BCCko ikasleak sukaldari
Bertso saioaren ondoren, Basque Culinary Centerreko ikasleek prestatutako jaki goxoak dastatzeko aukera izango da.
Menua prestatzeko, sagardotegietan oinarritu dira. Baita jateko eran ere: jan-edana gune batzuetan jarriko da, eta jendeak postuz postu afalduko du. Horrela, jakien eta bertso saioaren inguruko iritziak partekatu ahal izango dituzte elkarrekin.
Bigarren urtez
Orain bi urte antolatu zen antzeko beste bertso saio bat Basque Culinary Centerren, eta orduko arrakasta ikusita, berriro ere antolatzea erabaki dute; Insalusek lagundu du, eta Kronikak antolatu.