Atzo arratsaldean inauguratu zen, Goizuetako Santa Maria kalean, eskolaren parean, Gizarte Zerbitzuetako lokal berria. Goizueta eta Aranori emanen die zerbitzua aurrerantzean, orain arte bezala.
Unai Loiarte Goizuetako alkateak azaldutakoaren arabera, «lokala aldatu da herritar guztiei irisgarritasuna bermatzeko, eta zerbitzuak baldintza onetan emateko». Hain zuzen, atzoko inauguraziora gerturatu ziren herritarrak.
Mankomunitateko parte
Goizuetako lokala Gizarte Zerbitzuen Mankomunitatearen barruan dago; Goizueta, Arano, Leitza eta Areso hartzen ditu Mankomunitateak. 1990etik dago martxan, eta herritarrei zerbitzua ematen diete bulegoetan, 948 51 08 40 telefonoan edo Facebooken: Laga Gizarte Zerbitzua.
Lau programa nagusi dauzkate martxan, eta baita emakumeen eta gizonen berdintasun programa ere.
Lau programa nagusi
Gizarte Zerbitzuek lau programa nagusi dauzkate martxan: Harrera eta gizarte-orientazioa; Autonomia pertsonala; Haur, gazte eta familientzako arreta; eta Gizartean integratzen laguntzeko programa. Horien baitan, hainbat zerbitzu ematen dituzte: balorazio soziala eta diagnostikoa egitea eta zerbitzu espezializatuetara bideratzeko laguntza; mendekotasuna duten pertsonen autonomia sustatzeko laguntza edo etxez etxeko laguntza zerbitzua; ortopedia zerbitzua maileguan; drogomenpekotasun prebentzioa; jangela bekak; langileen kontratazioa; etorkinen integraziorako protokoloa eta erregularizaziorako laguntza; edota emakume eta gizonen berdintasun programa, besteak beste.