2016ko Udal Aurrekontuaren proposamena aztertuta, lau emendakin aurkeztu dizkio Astigarragako PSE-EEk. Zuzenketa partzialak dira denak, eta guztira, 69.000 euroko balioa daukate.
Alderdi sozialistak azaldu duenez, emendakinekin nahi dute «2016 urterako aurrekontua justuagoa lortu, eta herritarren onerako izango dena». Izan ere, «PSE-EEren helburua da, aurrekontu hau ahalik eta gehien hobetzea, eta lortuko dugula espero dugu», azaldu dute.
Duranek adierazi du, «gehien behar dutenekin solidarioa den Astigarraga» nahi dutela sozialistek, «aukerak sortuko dituena, eta kalitatezko enplegua eta zerbitzu publiko onak dauzkana».
«Irisgarritasun plan estrategiko bat egiteko partida eskatu dugu»
Lau emendakinen artean, diru kopuruz haundiena, «irisgarritasun plan estrategiko bat egiteko» eskatu du Mikel Duranek, Astigarragako PSE-EEren bozeramaileak.
Horretara, 25.000 euro bideratzea eskatu du Duranek: «partida horren bitartez, lortu nahi dugu Astigarragako Udalaren konpromiso irmoa, ekintza plan bat ezartzeko, ahalbidetuko duena ezabatzea barrera fisikoak, astigartar guztien erabateko integrazioa eragozten dutenak», azaldu du Duranek, prentsa ohar baten bitartez.
Irisgarritasun plan bat egiteko, 25.000 euroko partida eskatu du PSE-EEk.
Uholdeen eta euriteen arazoak konpontzeko, 20.000 euroko partida
Beste partida bat, 20.000 eurokoa, uholdeen eta euriteen kalteei aurre egiteko eskatu du Astigarragako PSE-EEk: «horiekin, inbertsio txikiak egitea nahi dugu, euriteek eta uholde posibleek eragiten dituzten arazoak konpontzeko», jakinarazi du Duranek.
«Gehien behar dutenekin solidarioa den Astigarraga nahi dugu», diote.
«Astigarragan enplegu plan bat ezartzea nahi dugu»
Hirugarren emendakina, enpleguari bideratuta aurkeztu du PSE-EEk: «18.000 euroko partida eskatu dugu, Astigarragan enplegu plan bat ezartzeko, errekuperazio ekonomikoa eta langabeziaren kontrako borroka sendotzeko, eta kalitatezko enpleguaren alde eginez». Horrekin, «herriaren dinamizazio ekonomikoa eta soziala bultzatu eta lagundu» nahi du PSE-EEk.
Eta azkenik, herrian Memoria Historikoa bultzatzea eskatu du, 6.000 euroko partida bat gordez.