Etxebizitza eskubidearen aldeko Urrunegi Hernani taldeak prentsa ohar bidez azaldu du bat egiten duela bihar Hernanitik pasako den Correscales martxarekin, eta herritarrei dei egiten die 10:00etan Txantxillako errotondara azaltzeko, «prekarietateari aurre egiteko. Hernaniko eragile desberdinok goizeko 10:00etan geratu gara Txantxillako errotondan».
«Milaka etxe huts; ehundaka Hernanin, eta ez dago bat guretzat?»
«Etxebizitza eskubidea dela diote, baina ezin dugu etxe bat lortu»
Urrunegiren esanetan, «prekarietateak milaka aurpegi ditu». Baina, azaldu dute: «etxebizitzaren arazoari heldu diogu urrunegitarrok, jakinda, prekarietatea bizitzako beste hainbat arlotan ere bizi dugula».
Hain zuzen, egungo etxebizitza politiken kontra azaldu dira, «xede bakarra dirua» delako. «Negozio, espekulazio eta interes pribatuetara bideratua dago etxebizitza politika oro, eta herritar guztiongan du eragina; bereziki, gazteongan edota etorkin eta baliabiderik gabeko herritarrengan. Etxebizitza eskubidea dela diote, baina ezin dugu etxe bat lortu, eta lortuz gero, ez da modu duinean izaten. Milaka etxe huts; ehundaka Hernanin, eta ez dago bat guretzat?».
«Prekarietatea eta gazteria elkar loturik doaz»
Etxebizitza lortzeko zailtasunek ez ezik, bestelako arlo batzuen egoeraren ondorioz gazteek prekarietatea gertutik ezagutzen dutela ere azaldu du Urrunegik. «Ezin dugu duintasunez lan egin, bizi edota ikasi; prekarietatea eta gazteria elkar loturik doaz».
Hori guztia dela medio, Correscales martxarekin bat egingo dutela adierazi dute, eta herritarrei parte hartzeko gonbitea luzatu diete.
«Gazteok ere, korrika!»
«Egoera honen aurrean ez gara geldi geratuko. Kasu honetan, korrika jarriko gara, prekarietatea bizi dugun guztiok batera korrika Bilbotik Bartzelonara. Korrika Prekarioa abian da, eta Hernanitik otsailaren 19an, ostirala, igaroko da goizeko 10:15etan. beraz, prekarietateari aurre egiteko bertan parte hartzera dei egiten dugu. Duintasuna eta burujabetzaren alde, prekarietatearen aurka! Gazteok ere korrika!».