Pasa den hilaren azkenean aurkeztu zen, Donostian, Gipuzkoa mailan martxan jarri den Oporrak Bakean programa, Basamortutik Euskal Herrira, Saharatik gure etxera lelopean.
Hernaniko Udalak ere bat egiten du programarekin, eta udaran haur sahararrak etxean hartzeko deia egin die herritarrei. Hain zuzen, programaren inguruko informazioa emango da gaur Biterin. Aurretik, 19:00etan hasita, anai-arreba sahararren istorioa kontatzen duen Wilaya pelikula jarriko dute, doan.
Basamortuan elkarrekin, berriro
Arratsaldeko 19:00etan jarriko dute Wilaya pelikula. Bertan, Fatimetu, Jatri eta Hayat anai-arreben istorioa kontatzen da; 16 urte kanpoan pasa ondoren, Smara izeneko probintziara, wilayara itzuliko da Fatimetu, amaren heriotza dela eta. Han, Jatri anaiak amaren herentziaren berri emango dio: familiako jaima eta Hayat ahizparen zaintza.
Horrela, bi ahizpek bidean aurkitzen dituzten zailtasunei egin beharko diete aurre.
11 urteko neskarentzako familia bila
Pelikula bukatutakoan, Oporrak Bakean programaren berri emango da. Ahalik eta familia gehienek parte hartzea nahi badute ere, bereziki 11 urteko neska bat etxean hartuko duen familia baten bila ari baitira, lehenago ere Hernanira etorri izan baita.
Informazio gehiago, Udaleko Lankidetza Sailean: marijo-m@hernani.eus/943 33 70 17/ Plaza Feminista, Aristizabal 7. Martxoaren 18ra arte eman daiteke izena, haurrak etxean hartzeko.
Era berean, Udalak gogorarazi du umeen bidaia gastuak Udalak ordaintzen dituela eta umeentzat udalekuak antolatzen dituela, doan.