Lau mozio berri aurkeztu ditu EH Bildu taldeak Astigarragako Udalean. Aurrenekoak «berdintasun politiketan aurrerapausoak emateko 15 konpromiso» biltzen ditu. Horien artean daude: «berdintasuna bultzatzeko esfortzu ekonomikoa areagotzea eta herritarrekin batera biolentzia matxistaren aurkako protokoloa, gizon eta emakumeen arteko berdintasuna arautuko duen ordenantza eta herriko puntu beltzen mapa lantzeko konpromisoa», baita «esperientzia eskolarekin jarraitzea», eta «Juanitonea etxearen atzealdeko plazari Martxoak 8 edo Emakumeon plaza deitzea».
Beste mozio batek, «astigartarron beharrak asetzeko larrialdi-laguntzak finantza dezan eskatzen dio Eusko Jaurlaritzari», eta azkeneko biak «eraildako emakume kurduen» eta «Sahararen autodeterminazioaren aldeko» adierazpenak dira.
«Larrialdi-laguntzak Eusko Jaurlaritza finantzatzea» eskatzen du beste mozio batek.
Aurrekontuen emendakinak aurkeztuko dituzte, gaur
Bestalde, gaur jarri du zita EH Bilduk, aurrekontuen inguruan aurkeztutako 24 emendakinak jendaurrean azaltzeko. 19:00etan izango da, Udaletxeko areto nagusian. «Inoiz aurkeztu den emendakin sorta zabalena» dela azaldu du EH Bilduk, eta esan du beraien proposamen sortarekin «Astigarragako Udalak aurkeztutako aurrekontu grisari kolorea eman» nahi diotela.