Hilaren 28an Zubietara joateko martxa antolatu da hainbat talderen artean; Hernanin, goizeko 08:30etan jarri dute zita, Plazan. Zizurkil, Tolosa, Zubieta, Lasarte eta Usurbilen ere egin dituzte deialdiak, martxan parte hartzeko, eta Zubietan elkartuko dira denak 12:00etan, ekitaldia egiteko.
Hain zuzen, deialdi hauekin bat egiteko eta indarrak biltzeko, beste hainbat ekitaldi ere antolatu ditu Hernanin Zero Zaborrek.
Erraustegiaren kalteen inguruan, medikuak
Hasteko, datorren astelehenean, hilak 22, hitzaldia emango dute Koro Zabaleta eta Jose Luis Paulin medikuek: Osasuna eta Errausketa. Gipuzkoako sendagile talde batek txosten bat osatu dute, errauskailuak pertsonen osasunean dauzkan eraginak aztertzeko, eta horren berri emango dute, arratsaldeko 19:00etan hasita, Biteri kultur etxean.
Mozioari atxikimendua
Bestalde, Hernanin Zero Zaborrek mozioa aurkeztuko du hilaren 23an egingo den Plenoan, eta norbanakoen edota taldeen atxikimenduak biltzen ari da, hernaninzerozabor@gmail.com helbidean. Mozioa zerozabor.ning.com webgunean irakurri daiteke.