Uholdeek arazoak sortzen dituzte Hernaniko kirol azpiegituretan, eta arazo horri irtenbidea eman nahian, Uholde Batzordea sortu berri dute Hernaniko Udalak, futbol elkartean eta errugbi elkarteak; hala jakinarazi dio Kronikari Udalak, prentsa ohar bidez.
Helburuak zehaztuta, aurreneko batzarrean
Uholde Batzordea otsaila hasieran bildu zen aurreneko aldiz, eta bertan adostu zituzten batzordearen osaera eta helburua. Batzordea urtean lau aldiz bilduko da; hortaz, hurrengo batzarra maiatzean izango da.
Helburuei dagokienean, nagusietako bat da, uholdeen ondorioz, Udalak eta kirol elkarteek izaten dituzten kalteei irtenbide bat ematea. Bestea da, kirol instalazioen kokapena aztertzea.
Uholdeen aurrean eman beharreko hainbat pausu
Uholdeen aurrean nola jokatu zehazten duten hainbat puntu zehaztu zituzten, aurreneko batzordean. Antolaketa komun baten beharra ikusi zuten. Uholde protokoloa martxan jartzeak duen garrantzia ere azpimarratu zuten, eta noski, betetzen dela egiaztatzea. Behin uholdeak gertatuta, izan diren kalteak lehenbailehen konpontzeko eman behar diren pausuak emateaz ere, hitz egin zuten. Uholdeen balorazioa ere, egingo da hemendik aurrera. Bestalde, uholdeen eragina ahalik eta gutxien izatea bilatu behar dela adostu zuten, horren alde lana eginda. Puntu horretan, garrantzia haundia du Urak Agentziarekin harremanak lantzeak. Instituzio ezberdinei egoera honen berri emateari buruz ere hitz egin zuten, eta baita ere, harremanak lantzeaz. Azkenik, herritarrei prozesu honen berri ematea erabaki zuten.
Kirol instalazioen kokapena aztergai batzarretan
Batzordean adostu zuten, baita ere, kirol instalazioen kokapena aztertzea. Horretarako neurtuko dituzte, dauden lekuan egotearen kalteak eta kostua. Kokapen ezberdinak ere aztertuko dituzte, izan leku berean edo beste batean. Erakunde ezberdinekin harremanetan jartzea ere, erabaki zuten, egoera honen berri eman eta harremanak lantzeko asmoz. Finantziazio iturriak bilatzeaz ere, hitz egin zen. Eta noski, herritarrei prozesu guztiaren berri ematea ere, adostu zen.