Aurreko postuetatik urrundu gabe jarraitzen du Urko Semperena astigartarrak, baita txapelketa garrantzitsuenetan lehiatuta ere. Burdeosen izan zen aurreko igandean, Gipuzkoako selekzioarekin, pistako Neguko Amerikana Txapelketan. Eta bikain aritu zen Semperena, jokatu zituen bi probetan podiumetik oso gertu geratuta.
Estreinakoz hartu zuen parte amerikana proban, Imanol Isasa oiartzuarrarekin bikotea osatuta. Maila haundiko proba izan zen, 47 kilometro orduko baino abiadura haundiagoan osatuta, belodromoari 100 buelta. Eta maila haundia eman zuen bikote gipuzkoarrak ere, laugarren sailkatuta, Remy Charbonnier eta Romain Mororen puntu berdinekin. Ludovic Suire eta Clement Betouigt (errepidean munduko txapeldunorde dena) nagusitu ziren.
Keirin proban, finalista eta bosgarren
Goizean amerikanan aritu bazen, keirin proban hartu zuen parte astigartarrak, arratsaldean. Eta aurre aurrean ibili zen, horretan ere. Finalerako sailkatu, eta bosgarren bukatu zuen. Frantses bat nagusitu zen horretan ere, Clement Delayen, 11:830 denborarekin, 60,862 kilometro orduko abiaduran. Unai Iribar gipuzkoarra izan zen bigarren.