2016 urterako Udal Aurrekontuari, 24 zuzenketa partzial aurkeztu dizkio EH Bilduk, «1.164.000 euroko balioaz». Azaldu dutenez, «auzoetako batzarretan jasotako ekarpenekin» osatu dituzte emendakin horiek, besteak beste.
Herritarren aurrean aurkeztuko dituzte datorren asteazkenean, 19:00etan udaletxeko areto nagusian. Herritar eta eragile guztiei luzatu diete gonbitea, bertaratu eta parte hatzeko.
«Udalak aurkeztutako aurrekontu grisari kolorea eman nahi diogu»
EH Bilduk adierazi du, «jarrera eraikitzailez» aurkeztu dituela emendakinak, «Udalak aurkeztutako aurrekontu grisari kolorea emateko. Gure ustez, Udal Gobernuak aurkeztutako dokumentua, ideiarik gabe eta herrirako proiektu zehatzik ez duen Udal Gobernu baten isla da».
Horregatik, aurrekontua «sakonki aztertu, eta inoiz Astigarragako Udalean inork aurkeztu duen emendakin sorta haundiena» aurkeztu du EH Bilduk.
Asteazkenean aurkeztuko dituzte, iluntzeko 19:00etan udaletxean.
Sagardo Plaza birmoldatzea, kiroldegiko lanak...
Emendakinetan bildu dituzte, EH Bilduk antolatu zituen auzoetako batzarretan jasotako proposamenak, eta horiez gain, beste hainbat: Sagardo Plazaren birmoldaketa, eskolako, haurreskolako, Anuska auzoko eta kiroldegiko lanak, herriko irisgarritasun plana berritzea, alokairua sustatzeko eta euskera ikasteko laguntzak, zahar egoitzan dinamizatzaile zerbitzua bideratzea, eta berdintasun politiketan sakontzea.
«Inoiz Astigarragan aurkeztu den emendakin sorta zabalena da gurea».
«Udalak bilerak antolatu bai, baina zertarako?»
Bestalde, Udalak auzoz auzo egindako bileren balorazioa ere egin du EH Bilduk: «pozten gara egin izanaz, parte hartze arautegia betetzeko ahalegina dutela ikusten baita. Hala ere, ekimen hau ez da Udal Gobernuaren ekimen propioa izan, aurka azaldu ziren arautegia betetzeko obligazioari erantzuna baizik».
Gainera, «harrituta» azaldu da EH Bildu, auzoetan entzundako eskaeren ondoren, Udal Gobernuak «ekarpen bat bera ere» aurkeztu ez izanarekin: «bilerak antolatu bai, baina zertarako? Ulergaitza da Udalaren jarrera, eta herritarrek bileratara joateko egindako esfortzuari muzin egitea oso larria da. Horregatik, herritarrekin gutxieneko begirunea izan nahi badu, guk aurkeztutako emendakinak irakurri, aztertu eta onartzeko eskaera egiten diogu Udal Gobernuari».