Munduko BTT proba gogorrenetakoa da Titan Desert by Garmin lasterketa. Marokoko lurretan egiten da, mendiko bizikletarekin. Ander Txakartegik eta beste hainbat kidek aspalditik zuten bertan parte hartzeko irrika, eta helburu hori lortu nahian, proiektu bat garatu zuten. Proban parte hartu zuten, eta bizitutako esperientzia guztia kontatzea erabaki dute orain. Horretarako bideo emanaldi bat antolatu dute gaur, Orona Ideon. Bertan, 3 minutuko trailer bat proiektatu eta proiektua bera aurkeztuko dute. Eta ondoren, 45 minutuko bideo bat jarriko dute. Bukaeran, bertaratutakoek dituzten zalantzak argitzeko aukera izango da. 18:30etan hasiko da eta sarrera debalde da.
«Proiektuaren parte zen laguntza humanitarioa eramatea. 6.000 eurotan baloratutako mendikamentu sorta eta 3 metro kubiko arropa eraman genuen»
Proiektua, hiru urte inguruko lana
Lasterketako parte hartzea, proiektu baten bueltan gauzatu zuten Txakartegi eta lagunek. Kronikari azaldu diotenez, Marokoko lurretan zen lasterketa, eta laguntza humanitarioa eramatea pentsatu zuten: «6.000 eurotan baloratutako medikamentu sorta eraman genuen, eta 3 metro kubiko arropa eramatea lortu genuen».
Txakartegik azaldu duenez, proiektua hiru urteko lana izan da: «bertso afariak, errifak... eta beste hainbat ekimen antolatu ditugu. Hori dena eta lasterketa bera laburbiltzen duen bideoa prestatu dugu».