Santa Ageda bezpera da gaur, eta tradizioak dioen bezala, herriko hainbat taldek errondak egingo dituzte Hernani, Ereñotzu eta Goizuetako kaleetan barrena.
Goiz eta eguerdi, eskolak
Ereñotzuko Txirrita Eskolako haurrek aterako dituzte makilak aurrena; 09:00etan aterako dira haurrak eskolatik, eta auzotik buelta emango dute makilak eskutan dituztela. Ondoren, Elizatxo Ikastolak egingo du kale buelta, 09:45etan hasita; eta Urumea Ikastolak ordubete beranduago, 10:45etan. Arratsaldean, patioan errepikatuko du Urumeak, 16:15etan. Inmakulada ikastetxeko haurrek ere, berriz astinduko dute makila eskolan bertan, 16:00etan.
Eguerdian aterako dira Hernani BHIko gaztetxoak, 14:30etan hasita, eta Santa Barbaratik emango dute buelta, koplak ahoetan.
Arratsaldean, abesbatzen txanda
Abesbatzek hartuko dituzte kaleak arratsaldean. Ereñotzukoak izango dira goiztiarrenak hemen ere: 16:30etan hasiko du etxez etxeko erronda Ur Mia elkarteak. Gero, 17:30etan elkartuko da Goiz Eguzkiko abesbatza eta Zaharren Egoitzan kantatuko ditu lehenengo koplak.
Milagrosa topagune izango da Ohitura Zaharrak abesbatzarentzat, 18:15etan, eta baita Kantuz abesbatzarentzat ere, 18:30etan. Bere bidea egingo du bakoitzak.
Goizuetan ere, zita jarri du Umore Onak, 18:30etan herriko plazan.