ikasturtea aurrera doa, eta, urtero bezala, hurrengoa prestatzen hasi dira Urumea bailarako ikastetxeak. Aurrematrikula garaia hasi zen astelehenean Hernani eta Astigarragako eskoletan, eta otsailaren 5era arte egongo da izenematea irekita. Goizuetan, ordea, otsailaren 15ean ireki eta 19an itxiko da, Nafarroako Gobernuaren aurrematrikula daten arabera.
Dena dela, momentu batean edo bestean gurasoek hartu beharreko erabaki bat da ikastetxea aukeratzearena. Eta horretarako, Urumea bailaran aukera zabala dute haur eta gazteek herrian bertan ikasi dezaten: Hernanin bost ikastetxek eskaintzen dute Haur eta Lehen Hezkuntza, eta bik Derrigorrezko Bigarren Hezkuntza; Astigarragan, Herri Eskolak 2 eta 12 urte bitarteko hezkuntza eskaintzen du, eta Goizuetan Xalto Ikastetxeak, 3 urtetik 13ra bitartekoa.
Hernanin, aukera zabala Haur, Lehen eta Bigarrren Hezkuntzako ikasketak burutzeko
Haur Hezkuntzan eta Lehen Hezkuntzan ikasi behar dutenek, hau da, 2-12 urtekoek, Hernanin bost ikastetxe dauzkate aukeran: Elizatxo, Inmakulada, Urumea, Langile eta Txirrita, Ereñotzun. Bigarren Hezkuntzan, aldiz, aukera txikiagoa da, bi ikastetxekoa: Inmakulada eta Hernani BHI. Azken honek bakarrik eskaintzen du Batxilergoa herrian bertan. Gainera, eskolen artean badaude desberdintasunak. Elizatxok, Inmakuladak eta Urumeak bi lerro dituzte, hau da, baimena daukate maila bakoitzeko bi gela irekitzeko. Bi urteko ikasleen kasuan, gela bakoitza 18 haurretakoa izango da gehienez, beraz, Haur Hezkuntzako aurreneko mailan 32 plaza dauzkate bakoitzak. Langilek, ordea, hiru gela izateko aukera dauka, hau da, asko jota 54 ikasle onartu ditzake 2 urteko gelan.
Ereñotzuko Txirrita Ikastetxea da bostetik bereziena.
Aurten 62 ikasle ditu, 2-12 urte bitartekoak, Lehen Hezkuntzako 6. maila arte. Jaiotza-tasaren arabera, 2 urteko sei ikasle berri izango dituztela aurreikusten du eskolako zuzendaritzak.
378 haur eta gazte hernaniar, aurrematrikulatzera deituta
Astelehenean, urtarrilaren 25ean, hasi zen aurrematrikulara 378 haur eta gazte hernaniar daude deituta: 149 haur 2014ean jaiotakoak 2 urteko gelarako, eta 2004ko 229 gaztetxo, DBHko lehenengo mailarako.
Herrian bertan ikastearen garrantzia
Hernaniko Udalak herrian ikastearen garrantzia nabarmendu nahi izan du, eta honek dituen abantailak azaldu ditu: «merkeagoa da; erosoagoa da; seme-alaben heziketa hurbil-hurbiletik segitu dezakezu; ikastetxearen egunerokotasunean parte zuzena hartu dezakezu; seme-alabek herrian bertan lagunarte zabala izateko aukera dute; herriko jarduerak eta zerbitzuak eskura dituzte: eskola-kirola, kultur jarduerak, kiroldegia, kultur etxea, musika-eskola...; eta herritarrentzako aberasgarria da».
Eta gainera, eskaintza «kalitatezkoa» dela diote: «euskalduna eta eleanitza, parte hartzailea, herrian txertatua, anitza eta integratzailea, herriko eskolen arteko elkarlana bultzatzen duena, ingurumena zaintzeaz arduratzen dena...».
Astigarragan, lau gela irekitzeko aukera iaztik
Ikasturte honetatik aurrera lau lerro izateko baimena eskuratu zuen iaz Astigarragako Herri Eskolak. Horrela, aurrematrikulazio epean 69 plaza eskaintzen dituzte 2014ean jaiotako 2 urteko haurrentzat. Denera, 88 ume jaio ziren urte hartan.
Hezkuntza estilo propioa, Astigarragako Herri Eskolan
Astigarragako Udalak ere bertan ikastearen onurak azpimarratu nahi izan ditu, batez ere, «Herri Eskolak herrian hazi eta harremanak sortzeko ematen duen aukera». Horrez gain, Herri Eskolan hezkuntza estilo propioa dutela aldarrikatzen dute: «Euskera eta euskal kulturarekin konprometitua, elkarren errespetuan hezten duen eskola, ikasleekin banakako arreta, ikasleen etengabeko arreta, irakasleen etengabeko prestakuntza, gurasoen partaidetza aktiboa, kudeaketa demokratikoa...». Gainera, DBH Martuteneko Arantzazuko Ama ikastetxean jarraitzeko aukera luzatzen diete ikasleei.
Goizueta eta Aranoko haurrek, izenematea otsailaren 15etik
Goizueta eta Aranoko haur askok Goizuetako ‘Xalto’ eskola publikoan ikasten dute 3-13 urte bitartean. Ikasturte honetan 73 ikasle daude, horietatik 56 goizuetarrak dira, eta 17 aranotarrak. DBHko 2.maila bukatzean, Leitzan jarraitzeko aukera ematen zaie ikasleei.
Kasu honetan, aurrematrikulazio epeak desberdinak dira, Nafarroko Gobernuak ezartzen dituelako: otsailaren 15ean hasiko da epea eta 19an bukatu.