Datorren ostiralean hasiko dira Inauteriak Hernanin, eta lehenbailehen iritsi daitezen desiatzen, dei hirukoitza egingo diete, asteburu honetan.
Gaur gauean aterako da Kaldereroen konpartsa, herriko kaleetan zehar lapiko eta zartaiak jo eta jo. Elur Txori elkartetik abiatuko dira, iluntzeko 21:00etan.
Aurretik, afaria ere egingo dute, elkartean bertan, festa borobila izan dadin. Arratsaldeko 19:30etan elkartuko dira, eta nahi duenak, elkartean dauka apuntatzeko lista. Prezioa 8 eurokoa da.
Iñude eta Artzaiak bihar, Urumea ikastolaren eskutik
Bihar, berriz, Iñude eta Artzaien konpartsa antzeztuko dute, herriko kaleetan zehar, Urumea ikastolaren eskutik. Eguerdiko 11:45etan aterako dira, eta Kaxkoko kaleetan barrena ibili ondoren, Plazan antzeztuko dute ekitaldi nagusia: Iñudeen haurrei txertoa eman ondoren, udaletxeko agintariei aurkeztuko dizkiete, beraien izenak erregistroan idatzita geratzeko. Gero, azkeneko arin-arina dantzatu, eta ikastolara bueltatuko dira.
23garren edizioa izango du Iñude eta Artzaien konpartsak, eta 250 lagunek osatuko dute aurtengoa; tartean, 50 dantzari, eta garai bateko pertsonaia ugari: globeroak, piruleteroak, barkileroak, umezainak, alkatea, idazkaria, sendagileak, erizainak, zapata-garbitzaileak, argazkilariak...
Musika Bandak, kontzertua
Urumea txaranga ere izango dute lagun, Plazako ekitaldian, eta Hernaniko Musika Bandak ere, Inauterietako kontzertua eskainiko du, urtero bezala. Udaletxeko arkupetan izango da, eguerdiko 13:15etan hasita, eta Tolosako Inauterietako kanta ezagunenak joko dituzte, Roberto Pachecoren zuzendaritzapean.
15 pieza izango dira: Diana, Pello Ziri Ziri, Baratzeko Pikuak, Galtzaundi, Pastelero, Farol Dantza, Paquita La Vergaresa, Isabelita, Habanera, Contrapas, Polka, Praskuarena, Habanera, Jota eta Irureta.