Gipuzkoako Kluben arteko txapelketako finala jokatu zen Donostiako Anoetako Belodromoan, eta bertan egon ziren Victor Alvaro Construcciones-Donosti Berri taldea osatzen duten bi astigartarrak, Tomas Otermin eta Telmo Senperena.
Garaileak izateko faboritoenen artean zegoen talde donostiarra, baina azken frogan azkarragoak izatearen ondorioz, Asturiasko Selekzioak bereganatu zuen garaipena.
Emozioz beteriko finala
Azkartasun, Scracht, Danesa, 500 metro... probak egin ondoren, aurreneko bien arteko desberdintasuna puntu bakarrean geratu zen, beraz, Taldeka Segitzeko proban erabaki zen dena. Horrela, Asturiasko Selekzioak garaitu zuen Donosti Berri taldea 80 zentesimako tarteagatik, eta Tolosako Limousin taldea gelditu zen hirugarren.
Juniorretan, hirugarren
Victor Alvaro Construcciones-Donosti Berri taldeak ere zorte ona izan zuen junior mailan. Urko Senperena astigartarrak, Hernani eta Donostiako beste kide batzuekin, osatzen duen taldea ere fin ibili zen eta podiumeko hirugarren postura igotzea lortu zuen. Bere aurretik, Tolosako Limousin bigarren, eta Aviron Bayonais garaile.
Pistako denboraldiaren bukaera, gaurtik
Pistako denboraldiari bukaera emateko, Gipuzkoako Bakarkako txapelketa egingo da gaur eta bihar, 16:00tatik aurrera.