Goiz xamar izan daiteke oraindik, denboraldia nola joango den asmatzeko, baina Jon Iruretagoiena eta Ainhitze Kalonjek entrenatzen dituzten neska-mutilak hasiera bikaia eman diote Gipuzkoako Batel Ligari.
Bihar jokatuko dute laugarren jardunaldia, 10:00etan Trintxerpen, eta beste 11 estropada geratzen zaizkie.
Hasi berria da Gipuzkoako Batel Liga, eta dagoeneko, garaipenen bat izan da tarteko. Indartsu daude arraunlariak?
Indartsu baino, gogotsu. Lan txukuna egin dugu neguan, eta kategoria guztietan ikusten ari da.
Badirudi Getaria eta Orio izan daitezkeela aurkari gogorrenetakoak. Zer falta zaio Hernaniri, horiei irabazteko?
Ez dakit zuzeneko aurkariak horiek diren. Kategoria bakoitzak dauka bere arerioa. Egia da jubenilek garaipen bat lortu dutela, eta besteetan, getariarrak izan direla aurrenekoak. Jubeniletan bai, zuzeneko aurkariak dira. Baina oraindik 3 estropada bakarrik jokatu dira, eta denbora gehiago behar dugu, aurkariak zein izango diren ikusteko.
«Erronkak zein diren denborak esango digu. Argi dago nagusia dela, talde guztiek liga jokatzea, eta beraien onena ematea»
Aurrena Gipuzkoako Batel Liga, ondoren, trainerillak, Udaberriko Liga... Erronkarik zehaztu al duzue denboraldirako?
Erronka horiek zein diren denborak esango digu. Argi dago nagusia dela talde guztiek liga jokatzea, eta beraien onena ematea. Garaipena ere etorri da, eta pozik gaude.
Diferentzia haundia dago liga batetik bestera?
Gipuzkoako Batel Liga apirilean bukatzen da, eta gero, trainerillak hasten dira. Baina hemen jubenil eta seniorretako neska-mutilak aritu daitezke, eta infantil eta kadeteentzako, Udaberriko Batel Liga hasten da.
Esango nuke ia-ia kirol ezberdinak direla! Batela oso teknikoa da, arina, jende arinarentzako. Trainerillak eta traineruak, berriz, beste maila bat eskatzen dute, bai fisikoki eta baita teknikoki ere.
Arraunlarien teknikan, indarrean, talde-lanean... nabaritzen al da, dagoeneko, progresiorik?
Noski. Batez ere bateletan, asko nabaritzen da aurreko urteetako lana. Lau arraunlari batera aritzen badira urte askotan, azkenean, batel hori ibili egiten da. Azken urteetan Hernanin lan txukuna egiten ari da kategoria bajuenetan.
Maialen trainerua uretaratzeak ere izango du eraginik, arraunlari gazteak motibatzeko. Pasa al zaizue burutik mutilen trainerua ere ateratzea?
Argi dago nesken trainerua uretan edukitzeak klubari asko ematen diola, gazteak motibatzeko garaian. Baina baita herria bera motibatzeko ere. Ez dakit zer den, baina zerbait ematen dio.
Mutilen traineruari dagokionez, berriz, oso zaila da galera horri erantzutea! Hernanin ez daukagu itsasorik, eta ibaian traineruarekin ibiltzea ez da posible. Neskek Pasaian entrenatzen dute. Beste klubek ez daukaten handicap bat dauka Hernanik.
Gipuzkoako Batel Ligan 8 batelekin ari zarete. Gehiago ere badauzka Hernanik?
Ligan 8 batel dauzkagu, bai. Baina ligatik kanpo ere beste batzuk uretaratzen ditugu, arraunlari guztiek arraun egin dezaten.
Harrobia badago orduan...
Harrobia? Bai! Lasai gaude, zentzu horretan!
Gipuzkoako Batel Ligan, Hernaniko 8 batel
- Promesa neskak: bi talde.
- Infantil mutilak: talde bat.
- Kadete mutilak: bi talde.
- Absolutuak neskak: talde bat.
- Jubenil mutilak: bi talde.
*Jubeniletako aurreneko taldeak lortu du aurreneko garaipena: aurrenekoa izan zen lehengo larunbatean, Donibane Lohizunen, eta bigarren egin zuen igandean, Pasaian.