Otsailaren 5etik 9ra ospatuko dira inauteriak Hernanin, eta hori iragartzeko kartel lehiaketa antolatu zuen Udalak. Bigarren urtez, Rubén Lucas murtziarraren kartela izan da gairailea: «egia esan ez nuen espero berriz ere iazko zortea izango nuenik; Hernaniko herriari eskerrak eman nahi dizkiot berriz ere aukera hau emateagatik».
Espainiako proiektu askoren egilea
Lucasek diseinatzaile lanak egiten ditu, baina berak ez du bere burua «diseinatzaile» gisa deskribatzen, nahiago du esan «paper-pegatzailea» dela. Azkenaldian proiektu dexente aurkeztu ditu lehiaketa desberdinetan: «Espainia mailan, proiektuak prestatzen aritu naiz azkenaldian, eta egia esan zorte haundia izaten ari naiz eta nire lanek kontatu dute jarduera batzuk iragartzeko», azaldu du Lucasek.
Rubén Lucas murtziarrak lehiaketa irabazten duen bigarren urtea da.
Teknika digitalarekin egindako kartela
Aurtengo inauteriak iragartzen dituen kartelean bi elementu nagusitzen dira, argi eta garbi: antifaza eta kolore biziak dira. «Margoaren kontzeptuarekin jolastea zen nire helburua. Izan ere, nire ustez inauterietako mozorroetan oinarrizko elementua da», dio egile murtziarrak. Aurreneko ideia buruan zuela, paperean nola jarri pentsatu behar zuen, eta azkenean «teknika digital bat» aukeratu zuen horretarako.
«Inauterietako mozorroan oinarrizko elementua da margoa».
Inauterien zalea
Diseinatzaile murtziarra inauterien zalea dela onartzen du: «Noski ospatzen ditudala inauteriak, gainera, garrantzitsua da atseden egunak hartzea eta maite duzun jendearekin pasatzea. Horrez gain, pertsonalki uste dut behar-beharrezkoa dela jai hau, bereziki, hainbestentzako garai txarra izaten ari denean. Askotan esaten den bezala: irribarre egitea munduaren aldaketan laguntzeko modu egokiena da».