Abian prozesuan murgilduta dago Ezker Abertzalea, Zutik Euskal Herria ebazpenetik gaur artekoaren balantzea egin eta ekimena hobetzeko.
Prozesu horretan «presoek daukaten garrantzia» azpimarratzeko, eta prozesuan parte hartzeko deia eginez, martxak antolatu dituzte espetxeetara.
Lan eguna, Garinen
Otsailaren 20an izango dira, eta hernaniarrak Terueleko espetxera joango dira. Horri buruz hitz egin eta azalpenak emateko, lan eguna antolatu dute gaur, iluntzeko 20:30etan. Garin tabernan elkartuko dira, eta herritar guztiei luzatu diete deia, parte hartzeko.
Horrez gain, batzar irekia ere egingo dute otsailaren 9an. Aurreneko fasearen balantzea egingo dute hasteko; espetxeetara egingo diren martxen berri emango dute gero; eta bukatzeko, Abian prozesuaren bigarren faseari buruzko argibideak emango dituzte batzarrean.
Kontzentrazioa Plazan, gaur
Ostiralero bezala, kontzentrazioa egingo dute gaur, preso eta iheslarien senide eta lagunek. 20:00etan izango da, Plazan, eta dei egin diete herritar guztiei, bat egiteko: «guztion artean ekarriko ditugu; kalera atera behar gara guztion artean presioa egitera».