Asteartean bildu zen Hernaniko Udaleko Plenoa, eta bitan landu zuten lan munduko klausula sozialen gaia: Udal eraikinen garbiketarako kontratazio pleguekin aurrena, eta prekarietatearen aurkako korrikari elkartasuna erakusteko mozioan ondoren.
Aurretik, hainbat puntu landu zituzten. Hasteko, iazko Udal Aurrekontuko bi kreditu aldaketaren berri eman zuten, eta baita aurrekontu egonkortasunari buruzko txostena ere.
Elizatxon, alokairua
Ondoren, Elizatxo auzoko 16ko behea alokairuan esleitzea onartu zen; Udalaren jabetzako etxebizitza da, eta baldintzak betetzeko obrak egin dituzte.
Udal eraikinen garbiketa egiteko, 36 langile
Udal eraikinak garbitzeko kontratazio pleguak ere eraman zituzten Plenora. «36 langile izango dira, eta bi urterako sinatuko da kontratua, beste bi urtez luzatzeko aukerarekin, Udala eta enpresaren artean», azaldu zuen Koro Etxeberria zinegotziak: «hainbat klausula finkatu ditugu, langileak baldintza onenetan aritzeko, eta bermatzeko hizkuntza politikari buruzko irizpideak eta berdintasuna».
Modu berean, jakinarazi zuen gutxitu egin dela arlo ekonomikoari ematen zaion puntuazioa, eta mahai bat eratuko dela ordezkapenen irizpideak zehazteko, Udalak ere zeresana izan dezan.
Andoni Amonarraiz EAJko bozeramaileak, komentatu zuen batzordean aipatu zela aukera, lanpostu finkoak sortzeagatik puntuazioa haunditzekoa. Pleguetan hori jasotzea ez dela posible argitu zuen Etxeberriak, baina behin enpresa hautatuta, harekin harremanetan zehaztu daitezkeela irizpide horiek, «baldintzak ahalik eta onenak izateko».
Orain Hernanik, berriz, bere desadostasuna erakutsi zuen: «EH Bilduk zioen bere programan, subkontratazioarekin amaitzea zuela helburu; guk ere helburu hori dugu», azaldu zuen David Guiradok. Horregatik, pleguak onartzearen kontra bozkatu zuen; EH Bildu, EAJ eta PSE-EEren botoekin onartu ziren.
Udala-herritarrak harremana errazteko, eskuliburua
Udala eta herritarren arteko harremana hobetzeko eta errazteko, lanketa prozesu batean ari direla azaldu zuen Inhar Olanok, eta orain, Udal izapideen eskuliburu baten idazketan ari dira.
Prekarietatearen kontrako mozioa, aho batez onartuta
Azken puntuan, mozio bat onartu zuen Plenoak, aho batez: Correscales, prekarietatearen aurkako korrika (otsailak 19-21 Bilbo-Bartzelona) babestea, Moviestarrentzat lan egiten duten teknikoen aldarrikapenei elkartasuna erakusteko. 1.000 euroko ekarpena ere egingo dio, eta prekarietatea sustatzen duten enpresekin dauzkan harremanak berraztertuko ditu. Orain Hernanik aurkeztutako testua ere gehitu zitzaion mozioari.