Azkar asko iritsi dira aurten Inauteriak. Halaxe iragarriko dute, behintzat, asteburuan kaleak alaituko dituzten konpartsek eta musikak.
Kaldereroetarako entsaioak
Aurrena, Inauterien iragarleak, Hungariako Kaldereroak iritsiko dira herrira. Larunbatean, 21:00etan aterako da konpartsa, Elur Txori elkartetik.
Horren aurretik, ordea, entsaiatu egin behar. Bihar, etzi eta etzidamu egingo dira entsaioak, 20:00etan Elur Txorin bertan, eta parte hartu nahi duen guztia joan daiteke.
Iñude eta Artzaiak, eta Musika Banda, igandean
Inauterietako giroak igandean izango du segida. 11:45etan Iñude eta Artzaien konpartsa aterako da, Urumea ikastolatik, eta Plazan bukatuko du, herrian barrena ibili ondoren. Segidan, 13:00ean, Hernaniko Musika Bandak kontzertua emango du arkupetan.