Urteko lehenengo plenoa izan zen larunbatean eta, aurreko akta aho batez onartu ostean, lau gai aztertu zituzten Udaleko ordezkariek: parte hartze, informazio eta gardentasun ordenantzaren aldaketa; EH Bilduk egindako eskaera zinegotziek fitxatzeari buruz; EH Bilduren mozioa garraio-hiriari buruz, eta, azkenik, uholdeen aurkako eta ibaiaren aldeko batzordeko kideak eratzea.
Aurreko legegintzaldian onartutako parte hartze ordenantzan, aldaketa
Aurreneko aztergaiak Kirolak, parte hartze eta gardentasun batzordeak luzatutako eskaerari erantzun zion. Udal ordezkariek aurreko legegintzaldian onartu zen parte hartzearen ordenantzari errekurtsoa jarri zion Carlos Urquijo Espainiako Gobernuak Euskal Autonomia Erkidegoan duen ordezkariak. Ondorioz, ondorengo aldaketak egingo dira, EAJren aldeko botoekin, eta EH Bildu eta PSE-EEren abstentzioarekin: «Erreferendum hitza kendu behar izan dugu, eta kontsulta munizipala zelakoa, kontsulta munizipala izango da».
Horrez gain, kontsultaren antolaketarekin jarraitzeko aste honetarako bilera deialdia egingo dela esan zuen Udal Gobernuak, EH Bilduren bozeramaile Andoni Gartziaren galdera bati erantzunez.
EAJk fitxatzearen aurka bozkatu zuen «bulegoko lanak ez duelako isladatzen herriaren alde egiten duzun guztia».
Soldatapeko zinegotziek ez dute fitxatu beharko, Alkatearen aurkako botoagatik
EH Bilduren eskaera bati erantzun zion hurrengo gaiak: liberatuta dauden zinegotziek fitxatu eta datuak udaleko webgunean argitaratzea. EH Bilduk bakarrik bozkatu zuen alde, EAJk aurka egin zuen eta PSE-EE abstenitu egin zen. Horrela bada, eskaera ez zen onartu Alkatearen kalitatezko botoarekin. Udal Gobernuak aurka bozkatu zuen «bulego lanak ez duelako isladatzen herriaren alde egiten duzun guztia».
EH Bilduren garraio hiriari buruzko mozioa, bertan behera
Garraio hiriaren aurka eta agroalde ekologikoaren aldeko mozioa izan zen ondoren aztertu zen gaia, EH Bilduk aurkeztutakoa hau ere. Mozioak dio «ekainak 24ean, BIDEGIk Astigarragaren etorkizunerako oso garrantzitsua den erabaki bat hartu zuen: Garraio Hiriaren proiektua bertan behera uztea», baina «erabakiak alda daitezkeela» onartzen du mozioak, eta horregatik Astigarragako Udalak hori ez gertatzeko «behin betiko baztertzea» onartzen du, besteak beste.
Ez zen onartu EAJ eta PSE-EEren aurkako bozkarekin. EAJk esan zuenez, «lurren jabegoa lortu arte, ez gara posizionatuko, baina ez dugu nahi proiektu hori gure herrian». PSE-EEk bere aldetik esan zuen: «uztailean lehenengo aldiz mozioa aurkeztu zenean aurka bozkatu nuen eta gure posizioak berdina izaten jarraitzen du».
DBHko proiektuari buruzko txostena juridikoa egiten ari dira eta horren zain dago Udala.
EAJ eta EH Bilduko 2 ordezkari eta PSEko bat, uholdeen aurkako batzordean
Larunbatean, plenoak uholdeen aurkako eta ibaien aldeko batzordea osatzen duten zinegotzien izendapena egin zen. Horrela, EAJ eta EH Bilduk bi ordezkari izango dituzte bakoitzak: Jesus Mari Santos eta Jon Arregi, eta Andoni Gartzia eta Ander Goikoetxea. Eta PSE-EEkoa Mikel Duran zinegotzia izango da.
Herri Eskola, DBH eta azoka, galdera eta erreguetan
Galdera eta erreguen txandan aztertu ziren beste gai garrantzitsu batzuk. PSE-EEko ordezkari Mikel Duran izan zen galdetzen lehena, eta pare bat galdera egin zituen, biak herriko hezkuntzari lotuak.
DBHko proiektua nola dijoan galdetu zuen, lehenengo, eta Udal Gobernutik erantzun zioten, alde batetik, «oraindik ez daukagu aholkularitza juridikoaren txostena», eta bestetik, «lur erreserba egin behar da, Udalaren izenean jarri, eta gero, Eusko Jaurlaritzaren eskura jarri behar da».
Herri Eskolari buruz, «kredituaren modifikazioaren zergatia» jakin nahi zuten bai EH Bilduk, baita PSE-EEk ere. EAJk erantzun zuen «Eusko Jaurlaritzak ez dauka konpromisorik bigarren proiektuarekin», horregatik, modifikatu behar izan dela kreditua. EH Bilduk salatu zuen gai honetan «Eusko Jaurlaritzak beste behin tranpa egin» duela eta gogorarazi zuen «Jaurlaritzaren alternatiba barrakoiak» zirela.
Beste alde batetik, EH Bilduko Andoni Gartziak salatu zuen «informazioa ez dela ematen eta prentsarengatik enteratzen gara». Eta adibide bezala jarri zituen gaur azoka errepikatuko dela eta autobus zerbitzu berria martxan jarriko dela. Azken honi buruz Udal Gobernuak erantzun zien: «Prest dagoenean, aurkeztuko zaio plenoari».