ABENDUKO esperientzia ikusita, azoka antolatu du, berriz ere, Astigarragako Udalak. Larunbat honetarako jarri dute zita, aurrekoan bezalaxe, goizeko 09:00etatik eguerdiko 13:00etara, Foru Plazan.
Udaletxearen parean jarriko dituzte postuak. Denetarik egongo da: produktu gastronomikoak, arropa... Gainera, Udalak azaldu duenez: «aurreko azokatik bederatzi postuk errepikatuko dute, gehienek. Izan ere, abenduko azokaren oso balorazio ona egin zuten saltzaileek».
«Gure helburua herrian mugimendua sortzea da»
Jose Mari Santos alkateak berak eskatuta abenduan antolatu zen aurreneko aldiz azoka, Ferianteen Elkartearekin elkarlanean. Helburu zehatza du azokak Udalarentzat: «Gure helburua mugimendua sortzea da, herria dinamizatzea».
Eta helburu berarekin antolatu da azoka, berriz ere. Izan ere, lehenengo esperientzia «oso positibotzat» jo zuen Santosek, horregatik errepikatuko da asteburu honetan: «berriz ere herritarrak animatu nahi ditut azokara joan eta bertan erostera».