Orain aste batzuk sinadura bilketa jarri zuten martxan kiroldegiko gimnasioko hainbat erabiltzailek, eta Udalak bilera deitu du konponbidea bilatzeko; datorren astelehenean izango da, hilak 25, 18:30etan kiroldegiko bulegoan.
Kexak, gimnasioaren egoeragatik
Sinadurak biltzeko jarritako paperean, sinatzaileek adierazi zuten: «gimnasioaren mantenimendu orokorra eskasa da; makina asko egoera txarrean daude; pesak egiteko barra bakarra dago; gehienetan ez dago arduradunik, laguntzeko, begiratzeko, edo behar izanez gero, norbait ohartarazteko. Azken batean, ondo ikusten dugu igerilekua konpontzea, baina ez gimnasioa alde batera uztearen trukean, guk ere gure kuotak ordaintzen baititugu, material egokia erabili ahal izateko».
Urtarrilaren 15ean, berriz, beste idatzi bat agertu zen «haserretutako erabiltzaileen izenean», sinadura bilketa «desagertu» izana salatzeko, eta konponbide bat eskatzeko.
«Beraiek entzuteko gaude»
Udaleko kirol zinegotziak, Esti Aldeiturriagak azaldutakoaren arabera, «Udalak sinadura bilketa jaso zuen egoera aztertzeko». Hain zuzen, bilera irekia deitu dute astelehenerako. «Jendea benetan hurbiltzea nahi dugu, proposamenak jasotzeko eta arazoari denon artean aurre egiteko; beraiek entzuteko gaude».
Bide batez, gogorarazi du badirela kexak edo proposamenak egiteko beste bide batzuk: «udaletxeko sarrerako zerbitzua (HHZ) edo webgunea».