Hernaniko Kaleratzeak Stop taldeak Kronikara bidalitako prentsa oharrean jakinarazi duenez, Maite Ortiz eta Jose Maria Erauskinen kontra, IRPHaren eta etxegabetzeen aurkako abokatuen kontra, espedientea irekitzea eskatu du Oviedoko Probintzia Auzitegiak: «Maite eta Jose Marik hasieratik babestu dute gure taldea, IRPHa baliogabetzen duten aurreneko epaiak lortu dituzte Estatuan, eta Europako Parlamentuan ere ordezkatu izan gaituzte. Gainera, PAH/Kaleratzeak Stop eta animalieen eskubideen aldeko plataformekin ere egin dute lana, modu boluntarioan. Orain jakin dugunez, Oviedoko Probintzia Auzitegiak espedientea ireki nahi die, ulertzen baitu euren jarrerarekin, Maite eta Jose Mari, Avilesen bizi diren bi agureren etxegabetzea oztopatzen ari direla».
Hernaniko Stop Kaleratzeak taldeko kideek azaldu dutenez, Maite eta Jose Mariren bezeroa adineko emakume bat da: «etxe baten jabea da, eta honekin bermea eman zion senarraren sozietate merkantilaren mailegu bati. Emakumeak ez du loturarik sozietate honekin, ondasunen banaketa eginda ezkondu baitziren. Enpresak porrot egin zuen eta banketxeak emakumearen etxea eskatzen du. Abokatuek ulertzen dute, emakume hau kontsumitzaile bat dela, hala ezartzen baitute, kontsumitzaileek sinatutako kontratuen abusuzko klausulen inguruko Europako araudiak eta Espainaiko legediak: kontsumitzailea dela, bere zeregin profesionaletatik at dabilen oro. Kontsumitzaile gisa hartzea garrantzitsua da, kontratuan abusuzko klausulak salatzeko aukera ematen baitu. Abokatuek hori defendatu dute; legediak aurreikusten dituen aukera guztietaz baliatu dira. Azken helegitea ordea, baztertua izan da eta epaileak espediente bat irekitzea erabaki du. Epailearen ustez, zuzenbidea abusuz erabili dute, modu ausartegian eta temerarioan».
Azaldu dutenez, bitarte horretan Europako Justizia epaitegiak ebatzi berri du abokatuek defendatzen dutena: «ondorioz, Maite eta Jose Mari epaiaren kontrako neurriak hartzea ari dira aztertzen orain, Europako araudiaren interpretazio oker baten bitartez abokatuak beldurtu nahi izan dituelako».
«Harro gaude»
Elkartasuna eta babes osoa adierazi nahi izan dute, prentsa oharrean: «beraietaz harro gaude, eta badakigu etorkizunean ere, zigortzen badituzte, bidegabea izango dela, ahulena babesten dabiltzalako».