Otsailaren 6ra arte bilduko dira Biterin, sahararren errefuxiatu kanpamenduetara bidaltzeko jakiak eta bestelako gaiak: arroza, lentejak, garbantzuak, pasta, azukrea, atuna eta sardinak oliotan, edota konpresak. «Kanpamenduetara iritsi arte ondo iraungo duena», azaldu du Gveiva Greimichek.
Eskoletan egin zen bilketa aurrena, eta orain biltzen dena gehituta, kanpamenduetara bidaliko da guztia otsailaren bukaeran, Piztu Itxaropena, Sahararen Aldeko 12garren Euskal Karabanarekin.
«1991 urteaz geroztik ez dugu gerrarik izan; legeak egin eta egin ari dira, eta egoera aldatzeko zain gaude»
Laguntza, behar-beharrezkoa
«Dauzkagun elikagai bakarrak dira Arjeliak, Espainiak edota Euskal Herriak ematen dizkigunak», dio Gveivak.
Janari bilketa antolatzen duen Saharar Errepublika Arabe Demokratikoaren (RASD) Aldeko ‘Otsailak 27’ Euskal Elkarteen Koordinakundeak osatutako txostenaren arabera, «2014an herri sahararrak 42.000 tona elikagai behar zituen ACNURek zehaztutakoaren arabera, eta orain arte 13.000 tona bakarrik lortu dira. Gainera, laguntza ez da modu erregularrean iristen, eta beharrezkoa da segurtasuna lortzea».
Gveivak berak familiari noizean behin laguntza bidali behar izaten diola onartzen du: «kanpamenduetako egoera oso txarra da. Hilero kajaren bat bidaltzen diot nik familiari, baina laguntza hori ez daukanik ere badago, eta iristen dena banatu egin behar izaten da. Gainera, udazkenean izandako uholdeen ondoren, adobezkoak diren etxeak desegin egin dira».
«Beti mantentzen dugu itxaropena, gure lurraldera bueltatzekoa»
Oraindik ere laguntza beharrezkoa badute ere, bestelako konponbide bat eskatzen du herri sahararrarak. «Gure lurra berreskuratzea da konponbidea. Itsasioa dauka, fosfato meategiak, benetako etxeak, ura, argia...».
Gatazka urte askotan ari da luzatzen, ordea. 1975ean Madrilgo gobernuak Maroko eta Mauritaniaren artean banatu zuen Mendebaldeko Sahara. Orduan, Martxa Berdea jarri zuen martxan Marokok, eta bi herrialde hauen inbasio militarra hasi zen. Ondorioz, sahararrek ihesari ekin zioten. Fronte Polisarioak errefuxiatu kanpamenduetan antolatu zituen iheslariak, Aljeriako Tindufeko basamortuan.
Su-etena 1991ko otsailean iritsi zen, eta Nazio Batuen bake plana jarri zen martxan. Gelditutako dago, ordea. «Beti mantentzen dugu itxaropena, gure lurraldera bueltatzekoa. 1991 urteaz geroztik ez dugu gerrarik izan; legeak egin eta egin ari dira, eta egoera aldatzeko zain gaude. Baina Mendebaldeko Sahara okupatuan ere egoera txarra da, eta asko gerrara jotzearen alde daude».
LAGUNTZARAKO BIDEAK
Saharar Errepublika Arabe Demokratikoaren (RASD) Aldeko ‘Otsailak 27’ Euskal Elkarteen Koordinakundeak antolatzen du Pinztu Itxaropena Euskal Karabana. Jakiak eta garbitasun gaiak biltzeaz gain, horiek errefuxiatu kanpamenduetara bidaltzeko bigarren eskuko kamioiak ere erosi behar izaten ditu. Hori horrela, laguntzeko bideak ireki ditu:
- Laboral Kutxako kontu korrontearen bitartez: 3035 0080 94 0800054177
- Harremanetan jarriz: 619 029 648 telefonoan (Gipuzkoa) edo helbide elektroniko bidez, koordinadora27febrero@gmail.com.