Astelehenean Ttapa Ttapa egitasmoaren balorazioa egin zuten Sandiusterrin Hernaniko Ongintzak, Udalak, medikuek eta parte hartzaileek. Lehengo urteko apirilean jarri zen martxan asteazkenero bueltaxka egiteko ideia, eta izandako arrakastarekin pozik agertu ziren denak.
Gaur ere, asteazkenero bezala, 10:30etan jarri dute zita, Atsegindegin. Beroketak egin ondoren, 10:45etan abiatuko dira bueltatxoa egitera, hamaiketakoarekin bukatzeko.
«Ariketa fisiko txikienak ere, onurak dauzka»
Asteleheneko balorazio bilerara gerturatu ziren Ttapa Ttapa egitasmoarekin bat egiten duten hainbat erabiltzaile, eta denak bat etorri ziren: «ibiltzea osasuna da. Gainera, etxetik ateratzen gara, lagunak egiten ditugu...».
Marta Barandiaran medikuak ere ariketa fisikoa egiteak dakartzan onurak azpimarratu zituen: «ikerketek erakutsi dute jokaera sedentarioak eta hilkortasuna lotuta daudela. Aldiz, ariketa fisiko txikienak ere onurak dauzka. Batetik, sistema muskular-eskeletikoa hobetzen da; muskuluak indartu egiten dira eta hobeto heltzen diete hezurrei; horrela, oreka hobetzen da eta erortzeko arriskua jaisten da. Bestetik, adimena, funtzio kognitiboa hobetzen da: hobeto sentitzen gara, eta antsietatea eta depresioa arintzen ditu. Gainera, pisua kontrolatzen laguntzen du, diabetesa eta hipertentsioa kontrolatzen laguntzen du, eta hartu-emanen bidez, gehiago sozializatzen gara. Azken batean, piluletan onena da Ttapa Ttapa; efektu desigaraitzik ez du, eta onurak nabarmenak dira».
Orain artekoa, bideoan
Balorazioarekin bukatzeko, azken urteko irudi eta bideoekin Beñat Iturriozek osatutako ikus-entzuneko lana aurkeztu zuten, laster interneten ikusgai izango dena.
Bertan, Ttapa Ttapak martxan jarrai dezan boluntarioek egiten duten lana ere eskertu zuten.