Aurten ere Bota bertsoa! egitasmoa antolatu dute elkarlanean Hernaniko Dobera Euskara Elkarteak eta Iraulio Panttalone Bertso Eskolak. Bertsoaren eta sagardogintzaren artean harreman estua egon da beti, eta hori berreskuratzeko helburuarekin sortu zen iaz egitasmo hau. Eta antolatzaileek diotenez oso arrakastatsua izan zen: «aurreko urteko balorazioa oso positiboa izan zen, oso giro polita sortu baitzen sagardotegietan». Horregatik, aurten iniziatiba errepikatu egingo dute.
Bigarren edizio honetan, Ze krisi?! gaiari erantzun beharko diote lehiaketan parte hartzen duten bertsoek.
Jatorri eta adin guztietako parte-hartzaileak
Proposatutako gaiarekin lotura duten bertsoak egin beharko dituzte parte-hartzaileek, eta ondoren, Hernaniko, Astigarragako eta Urnietako hainbat sagardotegitan jarriko diren kaxetan bota beharko dituzte. Bertan egongo dira bertsoak idazteko paperak ere. Paperean, bertsoa idazteaz gain, garrantzitsua da egilearen izen-abizenak eta harremanetarako telefono bat jartzea.
Antolatzaileek gogorarazi nahi dute, edonork hartu dezakela parte, jatorri- edota adin-mugarik gabe. Gainera, bertsoak edozein neurri eta doinuarekin egin daitezke.
Opari ugari, jokoan
Martxoaren 28ra arte bilduko dira bertsoak Hernaniko, Astigarragako eta Urnietako sagardotegietan, eta, ondoren, Iraulio Panttalone Bertso Eskolako kideek erabakiko dituzte bertso saridunak zein izango diren.
Iaz egin zen bezala, aurten ere hainbat aspektu sarituko ditu Bertso Eskolako epaimahaiak: bertsorik sakonena, umoretsuena, poetikoena, teknikoena, erritmikoena, xelebreena, originalena, morbosoena, kaligrafiarik txukunena duena... Eta saridunen artean hainbat opari banatuko dira: 2 pertsonentzako otorduak, hainbat kaxa sagardo, Aimar Olaizolaren kamixeta... Gainera, aurten nobedade bezala Errealaren eta Real Madrilen arteko futbol partidu bat ikusteko bi sarrera bikoitz oparituko dira.
Apirilean, emanaldia saridunekin
Horrez gain, Bota bertsoa! lehiaketan saria lortzen duten bertsoekin emanaldia egingo da, bertso guztiak bildu eta astebete beranduago. Hain zuzen, apirilaren 8an izango da Biteri kultur etxean, eta ordua aurrerago zehaztuko da.