Iritsi dela, azkenean, txotx garaia! Urduri?
Gogoarekin! Orain arte egin ditugun lanen emaitza orain ikusten da, ea jendeari gustatzen zaion ala ez. Saiatu, behintzat, egin gara.
Aurtengo uzta ona izan dela diote.
Hernani inguruko sagarrarekin egin dugu sagardo dena. Azken urteetan bertakoarekin bakarrik ari gara. Gorabeherak izaten dira, baina aurten sanoa izan da, eta gustora gaude. Sagardo onerako, sagarra ona behar da, eta baserritarren lana oso garrantzitsua da: sagarra zaindu, ondo bildu... Lan hori aipatzekoa da.
Sagarraren kalitatea, analitikak, kontrolak, tresna berriak... Asko aldatu da sagardoa?
Kalitatea, garbitasuna, tresneria... asko zorroztu dira, baina asko aurreratu da. Analitikak ere adierazgarri dira, ikasteko. Baina urtero sagardo desberdinak ateratzen dira, dagoen sagarraren arabera moldatu behar baita. Batzuetan gaxiago, besteetan gozoa gehiago, kolore gorrixeagokoa agian... Baina hori da naturala! Gu saiatzen gara barrikaren bat edo beste gozoxeago uzten. Baina ahal dela, beraien irakinaldiak ondo eginda edukitzea gustatzen zaigu.
Hori da Larre Gainen sekretua?
95ean ireki genuen txotxa, baina baserrian betidanik egin da sagardoa. Hori daukagu, negozio familiarra dela, eta astean zehar oraindik aukera daukagu sagardoaz hitz egiteko, harremanetarako... Gure bizitzaren parte da, azkenean.