Pronostiko guztiak hautsiz, Uterga txapeldun

Katedraren ustez, Urriza zen Masters Txapelketa irabazteko faboritoa; larunbatean ordea, pronostiko guztiak hautsiz, Utergak jantzi zuen ondo merezitako txapela. 27-30 irabazi zuen Utergak, eta joan den urtean txapelketa berean lortutako txapelarekin, bigarrena du larunbatekoa.
Oraingo honetan, udako txapeldunari irabazi behar izan dio Utergak; aurretik azaldu zuen errebantxa gosez zela, eta atera du nonbait, arantza hori. Uter­gak oso kontzentratuta jokatu zuen partidu hasieratik. Emozio askoko partidua izan zen, oso berdindua. Joko haundia eraku­tsi zuten bi erremontistek; Urri­zak kolpe freskoarekin ze­goela erakutsi zuen behin eta berriz; eta Utergak trebetasun haundiarekin eman zion erantzuna. 
Bederatzina berdindu ostean, markagailuan bata eta bestea aurreratuz joan ziren: 14-12, 14-15, 17-15 eta 17-17. Eta justu mo­men­tu horretan iritsi zen, erabakiorra izan zitekeen tantua. Polemika haundia piztu zu­en, eta Urrizaren jarraitzaileek go­gotik kritikatu zuten. Urriza justu-justu iritsi zen Uter­garen dejada batera, eta pelota altxa zuen. Goitik beherakoan ezker horma ukitu zuten, eta epaileak txapa eman zuen. 18garren tantua izan zen Utergarentzat. Urrizak berdindu egin zuen 18-18, baina Do­neztebeko aurrelariak zuzenean eman zuen markagailua 18-22ra eta 19-25era. Urriza saiatu zen, eta markagailuan gerturatzea ere lortu zuen, 27-29ra. Azken bolada hori ez zen nahikoa izan ordea, eta txapela Doneztebekoak jantzi zuen.