Paul Ojuel eta Aitor Gorrotxategik osatzen duten bikoteak eraman ditu txapelak Gabonetan zehar Donostiako Altza auzoan jokatu ohi den txapelketan.
Ojuel-Gorrotxategi bikoteak 22-12 irabazi zion Ugalde-Arratibel bikoteari. Baina, ez zen partidu erraza izan. Hasieran, zaila izan zitzaien pelota mugitzea: alde batetik, bi atzelarietako inork ez zuelako pelota menperatzen, eta bestetik, aurrean, Ugalde zehatzagoa zelako errematean.
Galtzen hasi ondoren, txapelak etxera
Hernaniko bikotea 5-2 eta 9-6 galtzen ari zenean, pelota aldaketa egin zuten, indar gehiagoko pelota atera zuten, eta partidua goitik behera aldatu zen. Gorrotxategi nabarmentzen hasi zen, Oiartzungo aurrelariari parte hartzeko hutsunerik utzi gabe. Orduan, partidua 9na berdindu zuten, eta ondoren, 15-10 eta 20-12 egin zuten. Partiduaren zati horretan Arratibelek akats asko egin zituen, eta horren ondorioz, Ojuel patxadaz jokatzen hasi zen, gogoz errematatuz eta partiduko tanto hoberenak eginez.
Azkenean, egin zuten ahalegin haundia saritzeko, txapela eraman zuten Paul Ojuel eta Aitor Gorrotxategi.
Oiartzungo Ugalde-Arratibel bikotearen aurka irabazi zuten (22-12) Gabonetan zehar egin zen txapelketan.
Alebin eta infantilak gaur, Hernaniko frontoian
Gaur ere eskupelotaz gozatzeko aukera izango da Hernaniko frontoian. Gaur eguerdiko 12:00etatik aurrera, aurrez aurre jokatuko dute Pelotarien Taldeko gaztetxoenek: Tejedor-Lasa infantilek, Behar Zanakoen aurka; eta Egaña-Artola alebinek, zestoarren aurka.