Hernaniko bolariak prest dira, denboraldi berriari ekiteko. Bihar hasiko da Gipuzkoako Bola Txapelketa, eta bi tiralditan jokatuko da: aurrenekoa Ereñotzuko bolatokian bihar bertan; eta bigarrena Mutiloan, datorren astean. Bi tiraldiak batuta brila gehien botatzen dituenak lortuko du garaipena.
Ereñotzuko tiraldian parte hartzeko, goizeko 08:30etatik 11:00etara eman beharko da izena; goizeko tiraldia 13:30ak ingurura arte luzatuko da. Arratsaldean berriz, 16:00etatik 17:00etarako ordutegian izango da izena emateko aukera; eta tiraldia gehiago luzatuko da.
Hernaniko hiru talde
Gipuzkoako Bola Txapelketan 14 bola taldek hartuko dute parte, eta horietako hiru Hernanikoak izango dira: Elur Txori, Ur Mia eta CD Hernani. Talde bakoitzean 6 bolari ariko dira, beraz, 18 bolari hernaniarrek hartuko dute parte, guztira.