Gabonetan izan arren, txirrindulari astigartarrek lanean jarraitu dute, eta larunbatean, Gipuzkoako Challenge Txapelketako seigarren jardunaldia jokatu zuten. Ez zituzten, ordea, oso emaitza onak lortu.
Kadeteak, juxtu
Kadeteetan, Tomas Otermin eta Telmo Semperenak aurkari oso gogorrekin egin zuten topo. Denera, hiru proba egin zituzten: danesa proban, ez zuten punturik lortu, hurrenez hurren 11garren eta 14garren sailkatu batiziren; scratch proban ere ez zuten punturik lortu, 11garren eta 17garren egin baitzuten; eta azken proban, puntuaziokoan, Telmo Semperenak puntua lortu zuen, 10garren sailkatuta, baina tarteko esprinetan ez zuen gehiago lortu.
Juniorrak ere, antzeko
Urko Semperena juniorrak, berriz, seigarren postua lortu zuen japonesa proban, eta 8garrena, scratch-en. Hala ere, puntuazioko proban erretiratu egin behar izan zuen.
Sailkapen orokorrean, ondo
Emaitzak espero bezain onak izan ez baziren ere, sailkapen orokorrean postu onetan mantentzea lortu dute astigartarrek, eta larunbat honetan, txapelketako azken aurreko jardunaldian, hobetzeko ahalegin guztia egingo dute.
Alebin eta infantilen entrenamenduak, martxan
Bestalde, alebin eta infantil mailako txirrindulariak, Tasio Semperena eta Jaime Romero astigartarrak tarteko, hiru hilabete pasa dituzte ginkanak egiten, eta orain, bizikletarekin entrenatzen hasiko dira; astearte eta ostegunetan elkartuko dira, 18:00etan belodromoan, otsailean hasiko duten denboraldirako prestatzeko.