Ilusio, negar-malko eta goxoki artean emango diete ongietorria Hernaniko haurrek Errege Magoei. Urteko gau lanpetua dute aurretik, eta merezi duten bezala, egingo dute sarrera Hernaniko kaleetan zehar.
Urbieta kaletik abiatuko dira, arratsaldeko 18:00etan, Meltxor, Gaspar eta Baltasar, erregeak, haien gameluek eta pajeek lagunduta. Kalea zeharkatu ondoren, Izpizua kalea igo, Portalez kanpotik sartu, Andre Kalea jaitsi eta Kale Nagusia igo. Bide osoan zehar karameluak banatuko dituzte (glutenik gabeak).
Bukatzeko, Errege Magoek geldialditxoa egingo dute Plazan, udaletxeko arkupetan. Bertan, Hernaniko haurren azken eskaerak jaso, haiekin argazkiak atera, muxuak eman eta txikienei oparitxoak banatuko dizkiete.
Zapata garbia, jana eta edana, prest
Errege Magoek eskaera guztiak kontuan hartzeko eta nahi ditugun opariak ekartzeko, gaur gauean txintxo-txintxo ohera goiz joan beharko dute, zapata garbia Gabonetako arbolaren azpian utzi ondoren. Gainera, ez ahaztu Errege Magoek lanean emango dutela gau osoa, beraz, gosea kentzeko garrantzitsua izango da bakoitzak nahi dituen jakiak prest uztea, haiek jan ditzaten, eta baita gameluentzako esnea ere.
Aurretik, Zaharren Egoitzan
Kabalgata hasi baino lehen, Erregeek Zaharren Egoitza bisitatuko dute, eta opariak banatuko dituzte han ere. yy