Gipuzkoako Challenge txapelketako seigarren jardunaldia izango da jokoan gaur; Anoetako Belodromoan, arratsaldeko 16:00etatik aurrera.
Joan den asteburuan bosgarren jardunaldia jokatu zen eta 119 txirrindulari abiatu ziren irteera puntutik, hiru mailatan banatuta.
Ikusteko moduko jardunaldia, larunbatekoa
Espektakulu ederra izan zen larunbatekoa; izan ere, Gipuzkoako taldeetan aritzen diren txirrindulariek federazio ezberdinekin lehiatzeko aukera izan zuten; Belodromoan izan ziren Frantziako federazioko txirrindulariak, eta baita Asturias eta Aragoiko selekzioetakoak ere.
Open mailan, txirrindularitzan figura izaten ari diren txirrindulariak ikusteko aukera ere izan zen: Movistar, Euskadi eta Murias taldeetan aritzen direnak batetik; Leire Olaberria txirrindulari Olinpikoa bestetik...
Otermin nagusi, kadetetan
Astigarragako txirrindulariei dagokienean, Tomas Otermin astigartarra nagusi izan zen kadete mailan. Victor Alvaro Construcciones-Donosti Berri taldean aritzen da, eta larunbatean, atake gogor baten ondoren lortu zuen irabaztea; aurkariak atzean utzi zituen, eta Danesa proban ez zuen parekorik izan. Ondoren, bigarren postua lortu zuen Scratch proban; eta eguna borobiltzeko, bosgarren geratu zuen puntuazio proban.
Telmo Semperena taldekide astigartarra ere, Belodromoan izan zen larunbatean. Zortzigarren postua lortu zuen Danesa proban; bederatzigarren garatu zen Scratch proban; eta hirugarren egin zuen puntuazio proban, aurreneko bueltan bakarrik ihes egin eta gero.
Junior mailan, Urko Semperanak laugarren egin zuen Danesa proban; eta ondoren, mekanika arazoak medio, utzi egin behar izan zuen kanporaketa proba; hirugarren egin zuen puntuazio proban.