Omenaldi onena egin zion Hernaniko emakumezkoen taldeak Joxan Arabiotorreri, bere izena daraman torneoa irabazita. Asteazkenean jokatu zen Joxan Arabiotorreren omenezko txapelketa, Zubipen, eta txuri-berdeak izan ziren nagusi, bi partiduak irabazita.
Maila bikaina erakutsi zuten hernaniarrek, jokatu zituzten bi partiduetan. Tolosak Añorgari irabazi ondoren (1-0), haietako bakoitzaren kontra jokatu zuten, eta baita biak mendean hartu ere.
Aurrena, irabazlearen kontra jokatu zuten etxekoek, eta oso parekatua izan bazen lehia, berdinduta bukatu zuten markagailuan ere (1-1). Gauzak horrela, penaltietara jokatu zuten garaipena, eta hernaniarrek asmatu zuten gehien.
Añorgari irabazita, txapeldun
Aurreneko garaipena poltsikoan, Añorgaren kontra jokatu zuen Hernanik, eta irabazi egin zuen hori ere (1-0). Bi garaipenekin, beraz, txapeldun izan ziren txuri-berdeak, Tolosa eta Añorgaren aurretik. Leire Lopetegi tolosarra izendatu zuten jokalari onena.
Bertan izan zen Joxan Arabiotorre ere, eta berak banatu zituen sari guztiak.