Gipuzkoako Foru Aldundiak esker ona eta aitortza instituzionala egin dio Loreak filmari. Jon Garaño astigartarrak eta Jose Mari Goenagak zuzendutako filma izan zen Oskar sarietarako hautatuetako bat, ingelesez ez ziren filmeen atalean; hala ere, pelikula azken bederatzi aurre-aukeraketatik kanpo geratu zen, joan den astean. Atzo prentsaurrekoa eman zuten Denis Itxaso eta Imanol Lasa diputatuek, Iñigo Obesorekin batera, Loreak filmaren ekoizpenaren arduradunarekin alegia. Bertan azaldu zuten moduan, arrakasta haundikoa izan dela proiektuaren ibilbidea, «aurrekaririk gabekoa izan da. Gure kultura industrialarentzat eta zinemarentzat suspergarri izan da. Eta beraz, babesa eta sosteguna adierazten jarraitu behar dugu».
40.000 euroko laguntza
Prentsaurrean azaldu zutenez, joan den asteko Gobernu Kontseiluak erabaki zuen, departamentu ezberdinen bitartez, pelikularen ekoizleei 40.000 euroko diru laguntza ematea: «laguntzaren helburua da Oskar sarietako kanpainan, Loreak filmak Estatu Batuetan izan dituen promozio, komunikazio eta publizitate gastuen finantzaketan laguntzea».
Itxaso eta Lasaren esanetan, Gipuzkoarentzako aurrekaririk gabeko arrakasta izan da: «munduko sari-emate ekitaldirik ospetsuenaren partaide izateak aukera eman du Gipuzkoa eta bere marka nazioartean indartzeko. Loreak Gipuzkoako enpresek ekoiztu dute. Filmeko gidoilariak eta zuzendariak gipuzkoarrak dira. Pelikula osoa euskera hutsean eginda dago eta grabazioa, muntaia eta ekoizpen ondokoa Gipuzkoan egin dira. Gipuzkoa markaren eredu garbia da Loreak».