Urtarrilaren 13an irekiko da 2016ko txotx denboraldia Astigarragan, eta aurten aurreneko aldiz, Pintxotx lehiaketan parte hartzeko aukera izango dute tabernek. Baina, zer da Pintxotx lehiaketa? Astigarraga eta Hernaniko tabernek pintxo bat prestatu beharko dute, sagardotegiko menua oinarri hartuta; hori izango da gaia.
Lehiaketa txotx denboraldiarekin batera irekiko da, urtarrilaren 13an; eta hiru egunez, izango da pintxoak probatzeko aukera, urtarrilaren 15a arte. Pintxorik onena herritarrek aukeratuko dute, eta horretarako, taberna bakoitzean pintxoa puntuatzeko txartelak izango dituzte eskuragarri. Pintxoak euro batean salduko dira, eta probatzeko ordutegia 19:00etatik 20:30etara izango da.
Taberna irabazlearen izena Hernaniko txotx inaugurazio ekitaldian jakingo da, urtarrilaren 16an; irabazle bakarra egongo da; eta saria, txapela.
Izena emateko azken eguna gaur da
Lehiaketan izena eman nahi duten tabernek gaur dute azken eguna. Horretarako aukera bat baino gehiago: Hernaniko Turismo bulegoa, 943 33 70 28, turismoa@hernani.eus; edo 943 33 30 49 (Berriak elkartea).