«Inoizko adostasunik zabalena», 2016ko Udal Aurrekontuetan

Beste pixka bat haunditu da, datorren urterako ere, Her­na­niko Udaleko Aurrekontua. Aste­artean onartu zuten, ple­noan, eta 32.168.438 eurokoa izango da, Ereñotzuko Auzo Udalaren eta Ongintza Patro­natuaren aurrekontuak barne hartuta. «Inoizko adostasun zabalenarekin» onartu ziren, Luis Intxauspe alkateak azaldu duenez. Alde bozkatu zuen Gobernu Taldeak, abstenitu egin ziren Orain Hernani eta PSE-EE, eta kontra bozkatu zuen EAJ-PNVk.
%2,6ko gorakada izango du Udal Aurrekontuak, 2015ekoa­ren aldean. Igoera hori, diru sarrerak haunditzetik dator: «badira urte batzuk, pixkanaka haun­ditzen doala aurrekontua. Aurten, aurreikusten dugu Foru Aldundiaren eta Eusko Jaurla­ritzaren dirulaguntza igoko dela, eta hortik dator goraka­da», azal­du du Isabel Sanchez Ogasun zinegotziak.

«Inbertsio gehiago egiteko eta arlo batzuk indartzeko aprobetxatuko dugu»
Sarreren igoera hori, inbertsio gehiago egiteko eta beste atal batzuetan diru partidak igo­tze­ko aprobetxatuko du Udalak, gastu arruntak mantendu egingo baitira 2016 urtean.
Bi atal izango dira, bereziki, Udalak bultzatu nahi dituenak: «indartu nahi ditugu, ongintza eta gizarte zerbitzuak, batetik; eta enplegua eta tokiko gara­pena, bestetik. Enplegu zerbi­tzuak areagotu, adinekoei eta menpekotasun egoeretan dau­denei ematen zaizkien lagun­tzak indartu, alokairu sozia­le­ko etxebizitzak...».

Igerilekua haunditu eta kiroldegia berotzeko biomasa sistema jarriko dute 2016an, eta horretarako, 1.700.000 euroko partida jaso da Udal Aurrekontuan.

Bestalde, alkateak nabar­mendu du, «apustu garran­tzi­tsua» egin dutela energiaren arloan ere: «energia aurrez­te­ko eta energia berriztagarrien alde egiteko, ekintza plan bat jarriko dugu martxan».

Igerilekua haunditzea, inbertsio nagusia
Haunditu egingo da pixka bat, inbertsioen partida ere. Aurten, 3.206.441 euro gorde ditu Udalak horretarako, eta kirol­degiko igerilekua haunditzea izango da 2016ko inbertsio nagusia: «2015ean aldagelak berritu dira, eta irisgarritasun guztia egokitu. Orain, igerile­kua bera haundituko dugu. Herritarrek gehien erabiltzen duten instalazioa da, jaiotzetik bizitza osoan zehar, eta ez soilik ondo pasatzeko; ongiza­tea lantzeko toki bat ere bada igerilekua. Beraz, oso garran­tzi­tsua da», azaldu du Intxaus­pek.

Bi atal indartu nahi ditu Udalak 2016an: ongintza eta gizarte zerbitzuak, batetik;  eta enplegua eta tokiko garapena, bestetik. Bietarako partidak haunditu dituzte.

Eta horrekin batera, ener­gia aurrez­teko lanak ere egin­go dituzte kiroldegian: «bio­masa sistema jarriko dugu, kiroldegia berotzeko. %30 mu­rriztuko dugu energiaren era­bilera, horrela». Bi lane­ta­rako, 1.700.000 euroko partida jaso dute Aurrekontuan.

Uraren eta argindarraren instalazioak hobetu, kaleak eta landa bideak asfaltatu...
Beste hainbat inbertsio ere aurreikusi ditu Udalak. Esate baterako, uraren eta argin­da­rraren instalazioak hobetuko dira (248.000 euro), «kontsu­moa murrizteko helburua­re­kin, jasan­garritasunaren bidean»; kaleak eta landa bideak asfal­tatuko dituzte (145.000 euro); eta ikastetxeetan konponketak eta obrak egingo dira (115.000 euro).
Aurrekontuan jasotakoez gain, bestalde, 2016an exeku­tatuko dira, baita ere, 2015eko aurrekontuan jasota zeuden zenbait inbertsio: Etxeberri auzoa urbanizatzeko lanen bigarren fasea, Gay Mur erai­kineko patioa estaltzea (udan egingo da), Langile ikastolako jangela berria egitea, eta atle­tismo pistaren ondoko parkea estaltzea.

Berdintasun arloan eta kulturan, hausnarketa zabala
Bi hausnarketa zabal egitea ere aurreikusi du Udalak, datorren urterako. Aurrenekoa, berdin­tasun arloan: «betiko progra­maz gain, Emakumearen etxea martxan jartzeko konpromisoa hartu genuen, eta horretarako, parte hartze prozesu zabala abiatuko dugu; etxe horrek zer nolakoa izan behar duen».
Beste hausnarketa prozesua, kultu­ra­ren arloan bultzatuko du Udalak: «zer daukagun, nola hobetu dezakegun, nola apro­betxatu dagoen eskaintza...».
Sortu berria den gazte sai­lari dagokionez, programak eta egitasmoak bultzatuko ditu Udalak. Besteak beste, alokairu sozialera bideratutako lagun­tzak eskainiko ditu, «etxebi­zi­tza baita gazteen kezka nagu­sietako bat».
Eta haunditu egingo dira, baita ere, kale garbiketara bideratutako partida, eta parke eta lorategien mantenurako gordetakoa.

«Bide honetatik jarraitu behar dugu, elkarlanaren bidetik»
Gobernu Taldeak nabarmendu du, aurrekontuak osatzeko pro­zesua «inoiz izan den zabale­na» izan dela: «alderdi gehie­nen arteko elkarlana izan da, eta adostasunak lortu ditugu.  Lehenengo aldiz bildu dira hiru alderdi ezberdinen ekarpenak, eta hori historikoa da Herna­niko Udalean».
Zentzu horretan, uste du «bide horretan» jarraitu behar dutela: «aurrekontuak lantze­ko modu berri bat hasi dugu, denok esfortzua eginda, eta ez­ker ikuspegiko alderdien arte­an, elkarlana emankorra izan da. Bide honetatik jarraitu behar dugu, elkarlanaren bide­tik. Eta gure borondatea garbia da zentzu horretan».

Gobernu Taldea: «Aurrekontuak lantzeko modu berri bat hasi dugu, eta bide honetatik jarraitu behar dugu. Gure borondatea garbia da zentzu horretan».

Intxauspek azaldu duenez, hiru printzipio nagusitan oina­rrituta osatu dituzte aurre­kon­tuak: Hernani herri jasan­ga­rria izatea; herri parte har­tzai­lea eta aktiboa; eta herri soli­da­rioa, «munduari irekita bai­na euskal identitatetik abia­tu­ta». Zentzu horretan, nabar­mendu du Hernaniko Udalak mantendu egin duela, eta baita %0,79ra haunditu ere, garapen bidean dauden herrie­tara bideratutako laguntza.
«Ba­da­kigu nolako Her­nani nahi dugun, eta hori lor­tzera bide­ra­tuko ditugu neu­rriak eta inbertsioak», dio alkateak.
Isabel Sanchezek, bere aldetik, azpimarratu du Udala «oso saneatuta» dagoela, eta bere zorpetze maila oso txikia dela, soilik %6koa, Gipuzkoako Udalen bataz bestekoa %39koa denean: «kudeaketa onaren emaitza da hori».

EAJ-PNV kontra, «baina zenbait gaitan adostasunak lortzeko borondatearekin»
Aurrekontu proiektuaren kon­tra bozkatu zuen EAJ-PNVk plenoan, baina prest azaldu zen lanean jarraitzeko, «zen­bait gaitan adostasunak lortze­ko, eta etorkizunean, epe labu­rrera espero dugu, aurrekontu proiektua babestu ahal izate­ko», azaldu du Andoni Amona­rraiz bozeramaileak.
Aurrekontuei, osoko zuzen­keta bat eta 13 zuzenketa par­tzial aurkeztu zizkien EAJk, eta Ogasun Batzordean, eskatu zu­en aurrena zuzenketa partzia­lak bozkatzeko, horrela osoko zuzenketa kentzeko; «baina ez zen posible izan».

EAJ-PNV: «zuzenketekin, talde politiko ezberdinen arteko akordioa bilatu dugu, eta beraz, herriko arazoei irtenbidea emateko modu desberdinen artekoa».

Zuzenketetatik 6, atzera bota zituen EAJk, batzordeetan tra­ta­tzeko konpromisoa hartu zute­la­ko edo kontutan hartuko dire­lako etorkizunean. Besteak man­tendu egin zituzten; esate baterako, bilketa sistemari bu­ruz­ko eztabaida gune bat mar­txan jartzea, izendapen askeko langilerik ez egotea, edota oposizioaren lana erre­kono­zi­tzea: «ez zaigu dietarik ordain­tzen, ezta liberaziorik ematen ere. Bilduk rodilloa apli­katzen du, eta PSE eta EAJren hiru proposamene­ta­tik, soilik iritsi da plenora alderdiei eta zine­gotziei egin beharreko apor­ta­zioak haunditzekoa. Beraz, Orain Hernanik, PSE-EEk eta EAJk, mugatua daukagu gure ekintza politikoa, Bilduk har­tzen ditu­en erabaki okerren­gatik».
Modu berean, argitu du zuzenketa horiekin, talde poli­tiko ezberdinen arteko akor­dioa bilatu dutela, eta beraz, «herriko arazoei irtenbidea ema­teko modu desberdinen arte­ko adostasuna ere bai».

Orain Hernani abstenitu, zuzenketarik aurkeztu gabe
Orain Hernani, bere aldetik, abstenitu egin zen aurrekon­tu­aren bozketan: «batetik, ez dugulako zuzenketarik aurkez­tu; bestetik, noski, ez gaude­la­ko erabat ados EH Bilduren aurrekontu proiektuarekin; eta azkenik, beste alderdien zuzen­keta batzuekin bat gatozelako».
Jaione Aristregi bozeramai­leak azaldu du, bi asteko epea izan zutela zuzenketak aurkez­teko; «eta kontutan hartuta gure lana daukagula, ez gau­de­lako liberatuta, oso denbora mu­gatua izan dugu horreta­rako. Aurrekontuak ulertzean jarri dugu gure arreta, eta ez dugu aukerarik izan zuzen­ke­tarik aurkezteko».

Orain Hernani: «gai garrantzitsua dira aurrekontuak, eta ez dugu fundamenturik gabeko zuzenketarik aurkeztu nahi izan. Orain, urtebete daukagu formatzeko».

Modu berean, nabarmendu du Udalaren kudeaketako gai garrantzitsuenetakoa direla aurrekontuak, eta guztiz ulertu ez zituzten ziur ez zeudenez, ez zutela «fundamenturik gabeko zuzenketarik» aurkeztu nahi izan: «2016koetan ez dugu esku hartu. Orain urtebete daukagu formatzeko, eta 2017koetan zentzuzko zuzenketak aurkez­teko», argitu dute.
Bide batez, jakinarazi dute, 2016ko aurrekontua onartuta ere, ez dela aurrekontu itxia, aldaketak egiteko zabalik dagoela: «behar adina aldaketa egin daitezke exekutatzeko garaian, azken 8 hilabete­etan egin den beza­la­xe».

PSE-EE «pozik», bere zuzenketak aurrekontuan sartu direlako
Abstenitu egin zen PSE-EE ere, EH Bilduren proiektu politi­ko­a­rekin «desadostasunak eduki arren, prozesua modu egokian eraman dutelako, eta ados­ta­sun batzuk lortu ditugulako. Horren adibide da, guk aur­kez­tutako zuzenketa gehienak onartu edo, aldaketa batzu­ekin, aurrekontuetan sartu dire­la». Zentzu horretan, lor­tutako emaitzarekin «pozik» geratu da alderdi sozialista.
EAJk bezala, osoko zuzen­keta bat eta zuzenketa par­tzia­lak aurkeztu zituen PSE-EEk. Guztira, 20 zuzenketa partzial ziren, eta horietatik bost jaso dira aurrekontuan, hiru pun­tu­tan bilduta, 70.100 euroko kopuruagatik: pleno aretoa berritzeko, etxebizitzak berri­tzeko eta Garapen Agentzia eratzeko partidak. Gainera, azaldu dute beste hainbat konpromiso ere hartu dituela Gobernu Taldeak, PSE-EEren zuzenketen inguruan.

PSE-EE: «aurrekontuak egiteko prozesua modu egokian eraman dute, eta lortu ditugu adostasun batzuk. Horren adibide, gure zuzenketa gehienak sartu direla».

Beste bost zuzenketa, berriz, baztertu egin zituen Gobernu Taldeak, eta gaine­ra­koak PSE-EEk berak bota zituen atzera, modu batera edo bestera, aurre­kontuan jasota zeudelako.
PSE-EEk azaldu du, bestal­de, ez dagoela ados Gobernu Talde­ak daukan Udal pertsonal poli­tikarekin: «urteak dara­maz­­ki­gu salatzen, aldi bate­ra­ko lan­gi­leekin aritzea. Askotan esan dugu, adibidez, Udaltzain buru­a­ren kargua barne susta­pen batekin bete behar zela. Aurten, gai­ne­ra, udaletxeak hartu behar ditu bere gain, Garapen Agentzia­ra­ko kontra­ta­tutako langileak».