Txapela janzteko faboritoak ziren, eta ez zen dudarik izan atzo Galarretan: Endika eta Ezkurra izan ziren garaile Binakako Txapelketan, Matxin IIIri eta Ioni 40-24 irabazita.
Matxin III eta Ion ondo hasi ziren, eta 6-7 aurretik jartzea ere lortu zuten. Matxin IIIren bi paretakoak eman zien partidu osoko aurreneko abantaila, eta bakarra.
Baina gorriek ez zuten sorpresarik nahi, eta 7 eta 0ko partzialarekin aurrea hartu zuten, 13-7. Hurrengo 7 eta 2ko partzialarekin, partidua haustea lortu zuten; ordurako markagailuak 24 eta 13koa erakusten baitzuen, eta hortik aurrera, ez zen atzera bueltarik izan; 29-19 eta 36-19. 17 tantoko diferentzia izan zen partidu osoko haundiena.
Finala erabakita, Ezkurrak espektakulua eman zuen, eta Endika ere bikain ibili zen.
Ezkurra, mitoa haunditzen
Koteto Ezkurrak bikain jokatu zuen, eta diferentzia markatu zuen partidu osoan zehar. Atzoko tituluarekin, bikotekako bosgarrena lortu du, eta finaleko erremontista onena eta txapelketako aurrelari onenaren izendapenak ere lortu zituen. Pozik agertu zen atzokoan, egindako lanarekin: «Txapelketa jokoa emanez bukatu dugu, eta horrek lagundu egin digu».