Astigarragatik atera beharrik ez dauka, Gabonetaz gozatu nahi duenak. Eta horregatik, herriko eskaintza aprobetxatzera animatu dituzte herritarrak, Ikatza tabernak eta Isabel janari dendak.
Tabernan, «oso giro polita» izaten dela nabarmendu du Loli Etxeberriak: «poteorako ohitura haundia dago Gabonetan, eta jende asko biltzen da, bazkaldu edo afaldu aurretik egun seinalatu horietan. Hilaren 21ean, Santo Tomas egunean, esaterako, txistorra ematen dugu, eta jende asko elkartzen da tabernan, Donostiatik bueltan».
«Urte zahar egunean, askok poteatzen dute kabarekin»
Jendetsuak izaten dira 24ko arratsaldeko eta 25eko eguerdiko poteoak. Eta oso berezia, urte zahar egunekoa: «goizean, kantuan etortzen zaizkigu, eta hamaiketakoa ematen diegu. Eta arratsaldean, kabarekin poteatzen dute askok». Eta gauerako ere, bertaratzeko gonbitea luzatu diete, etxekoa izango baita DJa...
Errege egunaren bezperan ere bada berezitasunik: «roskoa ematen diegu, afalondoren datozenei», dio Etxeberriak.
«Sopakoa eta langostinoak bai, baina bestela, gutxiago erosten dute herrian, Gabonetan»
Isabel Mendiorozek, berriz, beherakada izaten du janari dendan, Gabonetan: «sopakoa eta langostinoak saltzen dira asko, oso tipikoak direlako. Baina bestela, jende gutxiago etortzen da, gutxiago erosten dute herriko komertzioetan, Gabonetan. Baina bertan topatuko dute behar duten guztia, eta gainera etxe ondoan».