Hil honetarako prestatutako ekitaldien artean, manifestazioa deitu du gaurko Hernaniko Sarek, gaixo dauden presoen alde; 19:30etan abiatuko dira Plazatik.
Bereziki, Gari Arruarte eta Ibon Fernandez preso hernaniarrak izango dituzte gogoan.
«Espondilitisa gaixotasun kronikoa da, eta kalteak pilatzen joaten dira»
Garikoitz Arruarte Almeriako espetxean dago, eta espondilitis ankilopoietikoa dauka. «Gaixotasun kroniko hau sendaezina denez, urteak aurrera joan ahala, kalteak pilatzen joaten dira», azaldu du Hernaniko Sarek. «Horregatik, espetxean egonda ezinezkoa da gaitzari aurre egitea: gaixoa profesional batek baino gehiagok artatu behar duelako batetik, eta bestetik, minari aurre egiteko edo zerbait arintzeko, botikak eskura izateaz gain, bizi-baldintza egokiak behar dituelako».
Gaixotasun hau broteka garatzen da: gaixoaren hezurrak elkarri lotzen dira, mugikortasuna galduz, gorputza okertuz, artikulazioetako ahalmena galduz...
«Esklerosi anizkoitzak gaixoaren autonomia izugarri mugatzen du»
Ibon Fernandez Iradi, berriz, Lanemezango espetxean dago. Esklerosi anizkoitza dauka eta zigorra etetea eskatu zitzaion epaileari 2014an, «bi medikuk ebatzi baitzuten gaixotasuna espetxearekin bateragarria ez zela». Baina epaia hiru aldiz atzeratu ostean, 2015eko maiatzan zigorra etetea baztertu zuen epaileak.
«Gaixotasun larri eta sendaezina da, eta gaixoaren autonomia izugarri mugatzen du, bai gaitza progresiboki okerrera dijoalako, bai tratamenduak eskatzen duen jarraipen estuagatik (...). Tratamendu egokia jasotzeko zentro batean egon beharko luke».