Espainiako Kongresu eta Senaturako Hauteskundeetan 10.260 hernaniarrek bozkatu zuten atzo. Kongresurako boto gehien jaso zituen alderdia EH Bildu izan zen atzo, 3.304. Atzetik, gertu, Podemos alderdia geratu zen, 2.863 botorekin. Hirugarren alderdi bozkatuena EAJ-PNV izan zen, 1.661 boterekin. PSE-EE (PSOE) izan zen laugarren alderdia 1.130 boterekin. PP 591 hernaniarrek bozkatu zuten; Ciudadanos 255 herritarrek; eta IUk 201 boto jaso zituen. Partehartzeak gora egin zuen atzo, 2011ko hauteskundeetan baino %2,21 altuagoa; abstentzioa %33,03koa izan zen.
2011ko hauteskundeekin alderatuz gero, Amaiur izan zen orduan alderdi bozkatuena, 4.747 botorekin. EAJ-PNV alderdiak 127 boto gehiago jaso ditu aurten; 2011n, 1.534 zituen. Gainerako alderdiak berriz, jaitsi egin dira; PSE-EEk (PSOE) 1.755 boto zituen 2011n, PPk 942 eta IUk 300.
Podemos garaile Gipuzkoan eta Hego Euskal Herrian
Podemos izan da Diputatu gehien lortu dituen alderdia Gipuzkoan, eta bi diputatu lortu ditu Kongresurako. Boto gutxiagorekin, Diputatu berak lortu ditu EAJ-PNVk; EH Bilduk eta PSE-EE (PSOE) alderdiek Diputatu bana lortu dute.
Hego Euskal Herriko datuei erreparatuz gero, Podemos izan da nagusi, baita ere; 7 diputatu izango ditu. EAJ-PNVk 6 diputatu lortu ditu; UPN-PP eta PSE-EEk (PSOE) 4 diputatu; eta EH Bilduk 2.
PPk irabazi ditu hauteskundeak, gehiengo osotik oso urrun
BIPARTIDISMOA izan zen atzoko hauteskundeetan, galtzaile nagusia. PPk irabazi zituen hauteskundeak 123 diputaturekin, 2011n lortutako gehiengo absolututik oso urruti; Kongresuak dituen 350 eserlekutik 186 zituen orduan. PSOE izan zen bigarren alderdi bozkatuena, 90 diputaturekin. Hirugarren postuan geratu zen Podemos, 69 diputaturekin; eta laugarren izan zen Ciudadanos 40rekin. Atzoko emaitzak eta gero, zalantzan dago nork gobernatuko duen. Akordioak izango dira hemendik aurrera, klabea.