Beñat Gaztelumendi da Gipuzkoako txapeldun berria. Inaxi Exaberen eskutik jantzi zuen atzo, ondo merezitako garaikurra. 7.000 lagunetik gora bildu ziren atzo Ilunben, eta guztien aurrean jantzi zuen Bertso Eskolako kideak, hirutan bilatu duen txapela. Alaia Martinekin jokatu zuen buruz burukoa; Gaztelumendik 637,5 puturekin lortu zuen pasea; eta Alaia Martinek 14,5 gutxiagorekin, 623 punturekin.
Gaztelumendik kartzelakoetan jo zuen gorena; eta batez ere, aurrenekoan; maila altua erakutsi zuen final osoan. Buruz burukoan, zortziko txikian Alaia Martinek baino ofizio hobea egin zuen, eta aurretik zekarren aldeak lagunduta irabazi zuen finala. Alaia Martinek final orekatua egin zuen, eta aurreneko kartzelakoan borobildu zuen, ordurarteko lana.
Bertso eskolako beste bi kideek ere, Agirrek eta Laburuk, maila ederra erakutsi zuten. Laburu aurretik joan zen final osoan, kartzelaraino; ondo merezitako hirugarren postua lortu zuen atzo. Agirrek lan ederra egin zuen aurreneko bi ofizioetan, eta kartzelakoan eman zuen finaleko onena.
Apalategi izan zen laugarrena, ofizioetan egin zuen lan onari esker. Aipatzekoa, baita ere, Iguaranek atzo egindako lana; txapelketako errebelazioa izan da amasarra. Maiak ez zuen egunik onena izan. Eta Xamoak ederki kunplitu zuen estreinako finalean.
Beñat Gaztelumendi:
«Banekien asko borrokatu beharko nuela txapela
janzteko, eta zenbait momentutan askatu egin naiz, lehertu dut, aurreko bi finaletan ez bezala. Berezia eta esanahi haundikoa izan da, belaunaldi bereko bertsolari bat izatea ondoan buruz burukoan».
Alaia Martin:
«Emozio asko izan dira, eta buruz
burukoan nengoela jakitean, hunkitu egin naiz. Helburu nagusia zen, nire bertsokera erakutsi eta nire burua errekonozitzea. Gustora nago egindako saioarekin».
Agin Laburu:
«Oso gustora nago egindakoarekin; pozik nire saioarekin eta hirugarren postuarekin, baina pena geratu zait, kartzelakoan galdu ditudalako buruz burukorako aukerak. Arriskatu egin dut, baina ez dut asmatu, eta hirugarren bertsoan ihes egin dit. Beti izan da nire puntu ahula».
Unai Agirre:
«Sentsazio onarekin geratu naiz. Beti daukazu gogoa gehixeago egiteko, baina txapelketan oso zaila da dena borobil ateratzea. Momentu batzuetan ez dut goia jo. Hala ere, firmatuko nuen saio hau, hasi baino lehen. Eta finala bera ere, saio ona iruditu zait».
PUNTUAZIOA
B. Gaztelumendi 1012
A. Martin 993
A. Laburu 614,5
I. Apalategi 603,5
U. Agirre 595,5
O. Iguaran 594
J. Maia 586
A. Oiartzabal (Xamoa) 571,5