Puntu bakarrarekin konformatu beharko zuela zirudienean, azken minutuan egin zuen gola Mundarrok, Aitor Labakaren burukadari esker, eta etxean geratu zen garaipena. 1-0 nagusitu zitzaizkion moreak Rotetari, larunbatean, eta zazpigarren postuan bukatuko dute urtea, Ohorezko Erregional Mailan.
Berdindua izan zen partidua Zarkumendegin. Urduri hasi zen Mundarro, eta Roteta izan zen baloiaren jabe, aurreneko minutuetan. Baina biek aukerak izanda ere, hutsean joan ziren atsedenaldira.
Bigarren zatian, nagusi
Bigarren zatian, berriz, hobera egin zuten etxekoek, baloiaren jabetza lortuta, nahiz eta gola egiteko biderik aurkitu ez. Azken minutuan aldatu zen dena moreentzat, Labakaren burukada Rotetaren sarera iritsi zenean.