Zergatik daude Gipuzkoako armarrian hiru hagin? Galdera horri erantzuteko asmoz, dokumental proiekzioa egingo du Hernani Errotzenek etzi, ostegunean. San Sebastian de Hernani tenentziari buruzko dokumentala izango da, eta iluntzeko 19:00etan jarriko dute, Biteri kultur etxean.
Solasaldia, proiekzioaren ondoren
Proiekzioaren ondoren bertan izango dira Jose Luis Orella, Beñat Iturriotz, Angel Rekalde eta Beñi Agirre. Euskeraz eta gaztelaniaz ariko dira.
Dokumentalaren laburpena
Nafarroako lurraldea, Estatu independentea zen garaian, bere administrazio eta defentsarako gaztelu edo herrien inguruetan zabaltzen ziren tenentzietan antolatzen zen. Gipuzkoa sortzeko, Gaztelak Aizorrotz, Ipuzkoa eta San Sebastián de Hernani itsasaldeko hiru tenentziak bateratu zituen, mendebaldeko Nafarroa okupatu ondoren (1200). Tenentzia historiko hauek probintziako armarrian agertzen dira oraindik ere, hiru haginek irudikatuta. San Sebastián de Hernani Oria eta Bidasoa ibaien artean zabaltzen zen, itsasoa eta mendiaren artean. Ikus-entzunezko dokumentu honek bere historia azaltzen du, Erdi Aroko Historian katedradun emeritoa den José Luis Orella Unzueren eskutik.