Lehenengo bueltako azken partidua jokatu zuen atzo Hernanik Cisnerosen aurka eta 51 (b)-17 galdu zuen. Atzetik ibili ziren denbora guztian trikoloreak, baina atsedenaldira bizirik iritsi ziren, 17-5, Pello Perezek egindako entsaio bati eskerrak.
Bigarren zatia hasi eta berehala, ordea, Cisnerosek partidua hautsi zuen. Hiru minutura entsaio bat egin zuten madrildarrek eta atzetik iritsi ziren beste bi. Hernaniarrak ez zeuden amore emateko eta Pello Perezen bigarren entsaioak eta Igor Genuaren transformazioak 34-12an jarri zuen markagailua. Eta sei minutura, etxekoen zazpigarren entsaioa. Bonusa lortzeko behintzat, gogor borrokatu zuen Hernanik, bigarren zatia bukatzeko 10 minutu faltan, Mattin Colladok hirugarren entsaioa egin baitzuen (39-17). Azkenean, laugarrena egin ezinik, bonusaren atarian geratu ziren.
Lukas eta Aranburu lesionatuta
Lehenengo zatiaren erdialdera, bi aldaketa egin behar izan zituen Hernanik lesioengatik. Aitor Lukas lunbarretako arazoagatik erretiratu zen eta Ekhi Aranburu sorbalda blokeatuta geratu zitzaiolako.
Denda, Gabonetan
Gabonetan denda irekiko du Hernaniko errugbi taldeak Plaza Berrin, farmaziaren ondoan. Gaurtik urtarrilaren 5era egongo da zabalik. Ordutegia: astelehenetik ostiralera, 17:00-20:00; eta larunbatetan, 10:00-13:00. Abenduaren 23-24 eta urtarrilaren 4-5, goiz eta arratsalde.