Iaz bezala, aurten ere Hernaniko Gure Esku Dagok Ametsen kriseilua ekimena antolatuko du Urte Zahar arratsaldean. Aurtengoa, Argitu erabakia izenpean egingo dute. «Zinkoenea berriz ere su argi ederrez apainduta ikustea guztion esku dago. Zeru iluna distira bereziarekin janztearekin batera urte berrirako ametsak eta nahiak lau haizeetara hedatu ahal izango ditugu hernaniarrok», adierazi dute.
Kriseiluak, salgai
Kriseiluak Gure Esku Dagok Andrekalen duen egoitzan izango dira salgai bi euro eta erdian. Honako egunetan egongo dira: abenduaren 17 eta 18an (17:00-19:00), abenduaren 19an (11:00-13:00) eta abenduaren 22, 23, 24, 28, 29, 30 eta 31n, goiz eta arratsaldez.
Iazkoaren antzera, parte hartzaile guztiek argazki lehiaketa batean parte hartzeko aukera izango dute.